Pangilad ni Duterte

Mao na ni ang bag-ong linya sa mga Duterte: Ang pagsukol sa China moresulta sa gubat sa West Philippine Sea (WPS) mao nga angayng mokanaog sa katungdanan si Presidente Ferdinand Marcos Jr. Gikan sa pasiuna nga pagpakahilom ug paghikuhiko karon mas klaro na ang ilang postura.

Labing bag-o nilang mensahe: Sakto ang pakigsuod

ni kanhi presidente Rodrigo Duterte sa China; sayop ang pakigsuod ni Marcos Jr. sa Estados Unidos batok sa China; ug ang dinalian nga pagpuli ni Bise Presidente Sara Duterte Carpio sa Malacañang mao ang makapugong sa gubat.

Mao ni labing uwahi nga sumpay sa nagkataas nang lista sa nag-usab-usab nilang mga linya:

Una, nipasangil ang kanhi presidente nga bangag si Marcos ug nihulagway si Davao City Mayor Baste Duterte sa presidente tapolan ug niawhag sa iyang resignasyon;

Ikaduha, supak sila sa Charter Change (ChaCha) ug mobuwag nang Mindanao gikan sa Pilipinas;

Ikatulo, uyon diay sila sa cha-cha ug wa diay problema si Marcos; ug

Ikaupat, duna diay silay gentleman’s agreement si China President Xi Jinping nga pasagdan nga madugta ang BRP Sierra Madre sa Ayungin Shoal.

Kay naapiki man sa awhag sa Malacañang ug sa nag-ung-ong nga mga imbestigasyon sa House of Representatives

ug Senado unsa pay iyang gipasalig sa China, ang kanhi presidente nikumbinar sa duha ka naandan niyang panghudlat: Mahimong gubaton ta sa China ug kudetahon si Marcos kon di siya paminawon.

Ang labing gamhanang sumbalik sa bisan unsay isulti sa kanhi presidente, nga gibase ra sab sa bisan unsay masud sa iyang bakukang, mao nga wa nay nikurog sa iyang mga hulga.

Bisan sa gibalikbalik sa ilang kampo nga mga pasumbingay sa una ug mas klaro nang awhag karon, way opisyal ni sakop sa militar ug kapolisan nga nibakwi sa ilang suporta ni Marcos.

Ug way timaan nga pabuthan ta og armas nukleyar sa China, sama nga nikakak sila sa mas agresibong pagsukol sa atong silingang mga nasud sa susama nilang mga pagpanghasi. Wa nay mailad sa mga Duterte. Kay mas kahadlokan unsa pay umaabot nga binuang nga kauyonan nga ilang sudlan uban sa China kon, simbako layo ra to, tabukon ang tibuok WPS, makabalik sila sa gahom.