Marka pataka
Bisan sa wa pa masuspenso si Cebu City Mayor Mike Rama, ang labing tukma nga paghulagway sa iyang administrasyon mao ang pataka. Nga dunay duha ka sukaranan:
• Una, isip kinatas-ang opisyal sa syudad ug tungod sa iyang gipatuo nga talagsaong kasuod ni Presidente Ferdinand Marcos Jr., kumbinsido ang mayor nga mahimo ang tanan niyang mahunahunaan nga way si bisan kinsa nga makababag; ug • Ikaduha, ang kabanga sa mga sinaligan nga naglibot niya maoy niseguro nga bisan ang labing yano nga inadlaw nga mga trabaho sa City Hall di magkadimao.
Bisan di kumplito, niang pipila sa mga pataka nga malikayan unta kon gitarung pa lang og han-ay:
• Pagpatrabaho sa kaliboan ka job-order workers nga way klarong dokumento, way klarong suweldo ug, labing importante sa mga magbubuhis, way klarong serbisyo sa publiko;
• Pagsuway pag-privatize sa Metro Cebu Water District (MCWD) ug pagtaktak nilang kanhi board chairman Joey Daluz ug kaubanan;
• Padayon nga pagpanghilabot bisan napilde sa kaso sa Cebu Port Authority (CPA);
• Pagtudlo og bag-ong project manager sa Cebu Bus Rapid Transit (BRT) Project bisan wa diay gahom pagduma sa proyekto sa Department of Transportation (DOTr);
• Pagbalhin sa Office of Senior Citizens Affairs (OSCA) sa upisina sa ikaduhang andana nga way pansayan ug pagbalik sa naandang nahimutangan dihang nabisto ang binuang;
• Pag-apura ug pagpasalig nga niresulta sa mas grabeng kalangay sa pagtiwas sa Cebu City Medical Center (CCMC); ug
• Pagpamugos sa computerization ug pag-ban sa walk-ins sa mga transaksiyon sa pipila ka departamento nga niresulta sa mas langay nga serbisyo.
Suspendido si Rama sa pagpasaka sa certificates of candidacy karong Oktubre. Di kagamit makinarya sa City Hall hangtod sa Nobyembre. Makapasamot ni sa kaguliyang sa iyang grupo sa eleksiyon sunod tuig.
Pulihan siya ni Acting Mayor Raymond Garcia nga nisukwahi na sa daghan niyang sulti. Mosamot ka way bilib ang mga konsehal nga hagbay rang nangluod kay mas naminaw sa mga tsuwawap kay nila. Mas hawang nga di siyang kawara-wara sa tibuok nasud atol sa Palarong Pambansa karong Hulyo. Mas sakit pa g’yud nga ang mga negosyante mahimong di na sama kamanggihatagon. Kay ang pagka suspenso nakapabantang nga dunay mas hawod pa niya.