Di malupig nga bentaha ni Bong Go ni Jun Ledesma

LAGMIT SI KANHI Special Assistant to the President, Sec. Bong Go, wa makaamgo nga ang iyang opisyal ug karon pribado nga pagtabang sa mga di-na-maihap nga mga tawo dunay mahinungdanon nga epekto di lang sa gidaghanon sa mga indibidwal ug komunidad nga natabangan kundili sa lawom nga gibati nga utang kabubut-on nga lagmit wa gyud niya mabatii gikan sa iyang natabangan.

Atong paminawon si UP Prof. Clarita Carlos. Dako ko nga magdadayeg niining usa ka higante sa mga intelektuwal tungod kay ang iyang mga ginapatik sa Facebook puro mga bulawanong hiyas nga libre niyang gipanghatag. Niadtong niaging buwan sa usa ka higayon, pwerte niyang sukoa kay ang iyang drayber na-istrok sa kasingkasing ug gidala gilayon sa Veterans Hospital kay retiradong sundalo. Naputong ug nasuko kaayo si Propesora Claire sa ospital tungod kay ninglabas man nga mora og kulang sa mga pasilidades nga gikinahanglan sa pasyente. Dangtan og mga 3 ka adlaw gikan sa iyang katapusang gisulat ug gipatik, ang propesora mora og ningkalma na ug diha-diha dayon ningbalik sa iyang pagbinayloay sa FB kauban ang iyang research team dala ang iyang malantip nga salabotan ug ekselente nga paghusga sa nagkalainlaing tema.

Mientras tanto, gikan sa akong gamay nga suok sa Davao, mopatik sab ko og mga asuy bahin sa mga kalihokan ni SAP Bong Go isip nag-inusara nga tigdeliver og mga tabang gikan sa iyang mga suod nga higala ngadto sa mga biktima og sunog, baha ug uban pang katalagman. Nailhan nako si Bong nga usa ka pormal ug mapaubsanon nga tawo nga naa kanunay sa kilid ni Mayor Rodrigo Duterte ug hangtod nga ninglingkod siya pagka Presidente. Importante kaayo si Bong sa Presidente sa wala pa siya mahimong SAP, sa panahon sa, ug bisan human sa iyang termino pagka SAP. Si Bong ang iyang kaban sa kasayuran, tigtubag sa mga tawag, appointment secretary, ubp., ubp. Ang orasan sa iyang lawas pareha sa Presidente ug bisan asa siya moadto, tua sab si Bong.

Kaniadto, si Presidente Duterte mismo ang moatiman sa mga panginahanglan sa mga biktima sa mga katalagman, sa panagsangka sa mga armadong pwersa ug kadtong nagkinahanglan og tabang sa tambal. Ang kadako ug kadaghan sa trabaho sa Presidente ninglimiti sa iyang presensya. Mao nga ang pobre tawon nga SAP Bong Go maoy nahimo niyang tig-implementar sa buluhaton nga akong gitawag og programa sa Corporate Social Responsibility sa Presidente.

Wa masayod ang kadaghanan nga si Bong Go dili estranyo sa trabaho sa CSR. Gitukod ni Mayor Duterte sa Davao City ang proyekto sa “Lingap”. Ang tumong sa maong proyekto mao ang pagtabang sa mga pasyente nga nagkinahanglan og atensyon sa ospital sa gobyerno o bisan pribado. Gitukod sab ni Duterte ang special clinic para sa mga bata nga dunay kanser. Ang opisina ni Bong Go ang in-charge sa pagtabang sa mga benepisyaryo. Sa sinugdanan ang “Lingap” gipundar para lang sa taga Davao City apan daghang pasyente gikan sa ubang probinsya nga gidala sa mga ospital sa Davao ang mahutdan sab og pundo ug gitunolan sa gikinahanglan nga tabang. Dugang pa, ang cancer clinic nahimo na nga kompletong ospital. Nagaatiman na kini og mga pasyente gikan sa Mindanao ug Visayas. Dili lang ang mga batang pasyente ang ginatagaan og kapuy-an, ang ilang mga ginikanan o bantay duna say kapuy-an.

May mga talagsaong panghitabo sa mga flash floods kaniadto sa Davao City ug usa sa pinaka grabe ningtabon og tubig sa usa ka subdivision dihang ang kusog nga bul-og sa Davao River ning-awas sa iyang tampi. Sa tungang gabii kadto nahitabo. Si Bong Go, usa ka hawod nga water ski rider, ningdali-dali dayon og atraka sa lugar nga gilunopan ug nag-inusara nga ningsalbar sa mga nagtungtong na lang sa mga atop sa ilang kabalayan.

Mao ni ang rason ngano nga wa ko masorpresa ngano nga ang EXSAP ningpursige gyud sa pagtukod og mga Malasakit Center sa tibuok kapupud-an sa wala pa siya moluwat sa iyang posisyon aron modagan sa Senado. Apan bisan karon og ordinaryo na lang siya nga lungsoranon, paminawon gihapon siya sa Presidente, mao nga ayaw mo katingala og ang mga Malasakit Center motumaw og kalit sa daghang suok ug kanto sa nasud.

Awtomatik si Bong Go nga moatraka sa mga lugar nga naagian og katalagman ug mangapud-apod og mga relief good ug ubang porma sa tabang nga gikan sa iyang mga higala ug dumadapig para sa mga biktima sa kalamidad ug kawad-on. Ang iyang ranggo sa mga survey sa mga “senatoriable” ningsaka na gikan sa numero 23, nga gihimo ang survey sa panahon nga nagtuo ang mga tawo nga di siya modagan, ngadto sa numero 8 sa survey nga bag-o lang nga gihimo sa DZRH. Gawas pa, nalabwan na niya ang iyang boss sa pagdeliber og mga diskurso sa mga importanteng okasyon. Ug ang mga naminaw ganahan kaayo niya bisan og way pamalikas. Niining panahona dili na siya ang tigguba og litrato nga bunyag sa media kaniya. Karon siya na ang sentrong persona sa larawan.

Kay ngano? Tugoti ko nga mosumaysumay sa mga pulong ni Prof. Clarita Carlos sa iyang gipatik sa FB: “Wow! Kamanggihatagon nga tawo! Kahibalo ko…tungod kay ninghatag sab siya og tabang ngadto sa akong drayber nga na-istrok sa niaging bulan… modako unta ang iyang tribu! Salamat, Bong Go!”