Bayede - Isilo Ngesethu Isikhathi - Inkonyane Eysikhumbuzo
Ilanga elishone emini liyophinde libalele ezintabeni
Njengoba siqhubeka nokuzama ukwemukela iqiniso elithi iNkosi yethu isibuzile, ngifisa ukuthatha leli thuba egameni lemboni yezokuvakasha KwaZulu-Natal ngibhonge emswanini eNdlunkulu, esizweni samaZulu nabo bonke abezwa ubuhlungu nabalilayo ngokuwa komuthi omkhulu. Ngokwebuza kweSILO SamaBandla Onke akulahlekelwe isizwe samaZulu neNdlunkulu inhloko kepha kushiye ugabagaba lwesikhala embonini yezokuvakasha, okuzoba nzima ukusigcwalisa.
INgonyama kaZulu isishiye ngenkathi imboni yezokuvakasha izama ukuvuka izithathe ngenxa yomthelela wokhuvethe. Besinethemba lokwesekwa yiSILO nobuhlakani baso esibubone eminyakeni edlule ngenkathi sizama ukuvuselela imboni yezokuvakasha. Ngesonto elandulela ukwebuza kukaMdlokombane, mina neBhodi yeTourism KZN savakashela intaba yaseSandlwana nezinkundla zempi eRokersdrift, lapho sasimenywe khona uMasipala wesiFunda Umzinyathi, Umzinyathi District Development Agency neKwaCulture abasicobelele ngezinhlelo abazihlongozayo ukuvuselela iSandlwana nezinye izindawo ezingamagugu. Lokhu bekungeminye imisebenzi yami eminingi ehambisana nezinhlelo zokuvuselela ezokuvakasha, onhloso yazo wukuqhakambisa izindawo zokuvakasha ezisemakhaya nasemalokishini. Ukuvakashela eSandlwana bese kuwukubuyela khona ngisabela ekhweleni elahlatshwa nguMntomdala, iNgonyama, elalithi kufanele kube khona okwenziwayo ukuvuselela inkundla yeMpi yaseSandlwana nezinye izindawo zokuvakasha nezamagugu kaZulu KwaZulu-Natal.
INgonyama kaZulu izokhunjulwa ngokuvuselela imikhosi yesizwe enjengoMkhosi WoMhlanga noMkhosi WeLembe, imikhosi eheha izinkumbi zezivakashi. Siyimboni yezokuvakasha, sibonga iNdlunkulu neSILO esesebuzile ngokuvumela imboni yezokuvakasha ukuthi iqambe isifundazwe ngokuthi yi“Zulu Kingdom”.
Ukuhlanganisa ezokuvakasha nesiko namagugu kaZulu kube neqhaza elikhulu ekusimameni kwezokuvakasha KwaZulu-Natal. Izivakashi zaphesheya kwezilwandle nezalapha ekhaya ziyaqhubeka nokuthutheleka KwaZuluNatal ukuzozitika ngobumnandi bezwe laKwaZulu ngenxa kaNgangezwelakhe.
Sidabukile ngokwebuza kweSILO ebesinombono, ebesithi ngaphezu kokwemukela amanye amasiko,sibiphinde siqinisekise ukuthi kunokuthula nenqubekela phambili esifundazweni sethu. Ukwebuza kweSILO okuzwakele umhlaba wonke, kwabikwa ngabezindaba baphesheya nabasekhaya kuwubufakazi bokuthi besithandwa kangakanani iSILO. Siyimboni yezokuvakasha sizimisele ukukhumbula amagalelo eSILO ekuthuthukiseni amagugu nezokuvakasha KwaZulu-Natal ngokubambisana nabo bonke abalingani bethu ukuze senze iKwaZulu-Natal indawo yokuvakasha engungqaphambili.
UMengameli uCyril Ramaphosa, enkulumweni yokukhumbula iSILO, ukuchaze kahle esikucabangayo ngenkathi ethi: “ISILO sasukumela indaba yokuvuselela imikhosi emibili yamaZulu eyayingasagqamile ngenxa yesandla sombuso wamakoloni, okunguMkhosi WoMhlanga noMkhosi Wokweshwama. Ngohlelo lwaso lokuvuselela amasiko, iSILO silekelele ukuthi lesi sifundazwe sibe yindawo eyigugu yamasiko nendawo yokuvakasha ewungqaphambili.”
Siyimboni yezokuvakasha sinejoka eSILWENI sethu esebuzile lokuthi sakhe imboni yezokuvakasha efaka wonke umuntu ezoheha izivakashi ezahlukene ukuthi zizozitika ngobuhle bezintaba zakithi, amabhishi akithi nezilwane zasendle. Isimo esikhona njengamanje esilethwe wukhuvethe nakuba besingahlosile senze ukuthi iKwaZulu-Natal ibe yindawo yokuvakasha ethandwayo eNingizimu Afrika, okuyinto esikade saba mandla ngayo. Sihlala sibonga izivakashi zethu zasekhaya ezihlale zivakashela isifundazwe sethu.
Siyimboni yezokuvakasha sikhuthazwa wukwesekwa esikuthola kuHulumeni, ikakhulukazi uNdunankulu uSihle Zikalala, ohlale esigqugquzela ukuthi siqhamuke namasu amasha, senze izinto ezibonakalayo ukuphucula izinga labantu baseKwaZulu-Natal. Sibonga ubuhlakani bukaMphathiswa uMhlonishwa uRavi Pillay oqhubekayo nokubamba amatomu enqola yezokuvakasha ukuzama ukuyikhipha obishini lokhuvethe. Sethembe abaholi futhi siyabeseka njengoba siqhubeka nezinhlelo zezokuvakasha ezihlose ukusimamisa ezokuvakasha ezindaweni zasemakhaya nezasemalokishini koMasipala besiFunda nabeNdawo nezikhungo zabo zezentuthuko.
Cishe indlela enhle yokuhlonipha iSILO esibe namagalelo angasoze alibaleka wukuthi sisukume, sisebenzisane futhi sivuselele imboni yezokuvakasha ekhahlanyezwe wukhuvethe. Asiduduzwe futhi sikhuthazwe wumlando weSILO sethu, siqhubeke sakhe imboni efaka wonke umuntu nehambisana nesiqubulo sama-United Nations Sustainable Goals esithi: “Asishiyi Muntu Ngaphandle”.
Ngeke ngigcizelele ngokwanele amandla ezokuvakasha ezinawo ukuvuselela igugu elinothile lawo wonke amasiko esiZulu aKwaZulu-Natal, ikakhulukazi ukuhlonipha INgonyama yamaZulu. Ezokuvakasha ziyithuluzi elimqoka lokusimamisa umnotho nokwakha amathuba emisebenzi. Sikhuthazwa futhi sigqugquzelwa osomabhizinisi abadala kule mboni, obuhlakani babo namava abo kusimamise imboni yezokuvakasha KwaZulu-Natal. Ukuvuselela imboni yezokuvakasha ekhahlamezekile nokukhumbula umvikeli wamasiko namagugu kaZulu, uNomthebe wesizwe kusikhuthaza ukuthi sibe nombono owodwa waloko esikufisayo ngesifundazwe sethu.
Ukungashiyi muntu ngemuva kusho ukuthi izinhlangano zethu zezokuvakasha namaCommunity Tourism Organisations (CTO) kufanele kuhleleke ngendlela yokuthi kube nabo bonke abalingani, kuhlose ukwakha imboni yezokuvakasha efundayo, esimamayo nechumayo.
Lena kuyoba yiyona ndlela enkulu yokuhlonipha iSILO sethu esebuzile uNgangezwe Lakhe, ebesizinikele ukuthi zonke izinhlanga zibuyisane ngokwamukela wonke amasiko.
Sizoqhubeka nokulalela nokwenza izigcawu zokuthi abantu bakithi bakwazi ukuxoxa izindaba zabo, balande ngolwazi lwabo oluzonothisa igugu lesiko lesifundazwe sethu ukuheha ezinye izivakashi. Ilanga lishone emini mhla zili-12 kuNdasa ngowezi-2021 kanti liyophinde libalele phezu kwezintaba zoKhahlamba nezaseSandlwana ukufudumeza ubuhle besifundazwe sakithi, ukubhonga kwamabhubesi nokububula kwezindlovu kuyophinde kududuze izinhliziyo ezibuhlungu, amahlathi amnyama aseNgome naseNkandla ayothukusa usizi lwethu, izinyembezi ezigelezayo ziyophenduka ithemba lamanzi ayogeleza emifuleni uThukela noMfolozi kuthi ulwandle lugeze umunyu esiwuzwayo.
Ukwebuza kweNgonyama kuyovuselela umoya wobuntu ngenkathi sisebenzisana ukwakha isifundazwe esisimamayo esiyigugu leNingizimu Afrika nendawo yezokuvakasha ewungqaphambili.
Hamba kahle Hlanga Lomhlabathi.