Oudburgemeester en sakeman oorlede
MBOMBELA - Wanneer die Conradie-gesin oor die Montrosebrug ry, praat hulle steeds van “pappa se brug”. Hulle pa, voormalige burgemeester Louis Conradie, het dié brug in 1981 help oprig en sy vrou, Frances en kinders sal dit as deel van sy nalatenskap koester.
Louis is op die ouderdom van 72 op 13 Junie 2019 onverwags by sy huis in Mthatha in die Oos-Kaap oorlede.
Hy en Frances het vanaf die 1970’s tot 2012 in Nelspruit gewoon en was prominente figure in die dorp.
Volgens sy vrou is hy in
1975 as siviele stadsingenieur aangestel. Onder sy leierskap het die munisipaliteit sy eie konstruksiespan op die been gebring. In 1981 het hy die privaatsektor betree. As terreiningenieur het hy toesig gehou oor die bou van ‘n behuisingsontwikkeling in West Acres, sowel as strate en dienste in Uitbreiding 11, wat die einste Montrose-brug ingesluit het.
Later, in 1984 het Louis sy eie maatskappy, Loulan Konstruksie gestig.
“Vele landmerke in die Laeveld dra sy stempel, onder andere Nelmed Forum, Village Mall, die Murraystraat-ontwikkeling, House of the Traditional Leaders, die BMW-gebou langs Riverside Mall, macadamia- en piesangpakhuise, en twee damme,” vertel Frances.
Tydens sy termyn as raadslid (1988 tot 1994) het Louis belangrike insette gelewer en hierdie tydperk afgesluit as burgemeester van Nelspruit van 1993 tot 1994.
In daardie tyd is daar elke jaar ‘n nuwe burgemeester verkies.
Dirk van Rooyen, wat stadsklerk was toe Louis raadslid en burgemeester was, onthou dat hy baie gedoen het vir plaaslike musiek.
Volgens Van Rooyen, is die nuwe burgersentrum onder
Louis se leierskap opgerig en die stadsteater het ook die lig gesien.
“Die ou vleuelklavier was verwaarloos en hy het gedruk dat ons dit moet restoureer. Die klavier is steeds daar,” sê Van Rooyen. Christa Steyn en Jannie du Toit het dié klavier kom inwy.
Die Conradie-gesin het vele male saam opgetree, met Frances agter die klavier en Louis met ‘n kitaar in die hand. Musiek het ‘n groot rol in hul lewens gespeel nadat die egpaar mekaar as stigterslede van die Tukkie-koor in 1968 aan die Universiteit van Pretoria ontmoet het.
Nadat hy Loulan Konstruksie in 2012 gesluit het, het hy aan verskeie groot projekte landwyd en in Mosambiek, gewerk. Die afgelope paar jaar het hy in Mthatha, Transkei toesig gehou oor die bou van meer as 30 reservoirs en kilometer-lange pypleidings as deel van die MIG-projekte en werknemer van GIBB.
Frances vertel dat hulle dikwels gaan skubaduik het en dat haar man ‘n passie vir die natuur en fotografie gehad het.
“Baie mense getuig van sy voorliefde vir veldblomme, goggas en diere, asook sy wye belangstelling in gesondheid en kwantummedisyne. Hy was entoesiasties oor alternatiewe kragbronne en het in hierdie verband baie navorsing gedoen,” sê Frances.
Louis se begrafnis is Woensdag gehou. Hy word oorleef deur sy vrou, drie dogters Adéle, Minnette en Lize, asook sewe kleinkinders.
Louis sal altyd onthou word as ‘n liefdevolle man, pa, oupa en vriend, wat diep spore in die samelewing getrap het.