By Innibos gebeur daar heelwat ommibos
Innibos-feesgangers word vanjaar bederf met ’n paar aanbiedinge buite die feesterrein by Hoërskool Bergvlam, maar waar die feesgees eweneens lekker gaan vlam vat.
Clemengold Plaaswandel
Mbombela is natuurlik een van die tuistes van ClemenGold (SA se premium mandaryn) en feesgangers kan uitsien na ‘n interaktiewe plaasbesoek en natuurwandeling met megaboere Abraham van Rooyen en Willem Kieviet, sowel as skrywer Erns Grundling.
Kom leer meer oor produksiepraktyke, verskillende kultivars en die nuanses van vrugtebemarking.
Erns deel op sy beurt insigte uit sy stapervarings in Spanje en Japan en lees voor uit sy topverkoperboek, Elders.
Hy gee ook vir gaste tydens die plaaswandel ’n eksklusiewe voorsmakie van sy komende boek Sushi en Shosholoza.
Die kaartjie sluit ‘n verfrissende ClemenGoldjenewerverrassing by die plaasdam en ‘n boksie ClemenGold vrugte in. Kom in gemaklike stapskoene.
Geheime watervalle saam met York Timbers
Die bosboumaatskappy
York Timbers bied ’n toer aan na watervalle wat ’n mens gewoonlik nie op jou eie stoom sal kan besoek nie. Op hierdie unieke toer sal avontuurlustige feesgangers die asemrowende Manyeleti-valle besoek, asook die Emeraldwaterval.
Aangesien jy ’n kort afstand na elkeen toe sal moet stap, is dit belangrik om gerieflike skoene aan te trek. Onthou ook om ’n warm jas saam te bring.
Chelsea Blommeskou in die Laeveld Botaniese Tuin
’n Replika van die SuidAfrikaanse inskrywing vir die Chelsea Blommeskou in Engeland is by die Laeveld Botaniese
Tuin te sien ter viering van dié tuin se 50ste bestaansjaar. Die uitstalling, wat saamgestel is deur die voormalige Laevelder, Leon Kluge, het weer eens ’n goue medalje in Engeland ingepalm.
’n Vurige ysskaatsvertoning
Fire and Ice is ’n uitstaande ysskaatsvertoning wat die hele gesin saam kan geniet. Dit word aangebied by i’langa se ysskaatsbaan.
Plaaslike digters gooi die rym
Words in My Mouth is ’n sogenaamde poetry slam waar plaaslike digters die kans kry om hul slag met woorde te laat opklink. Dit word gehou by Blue Gate-teetuin in Ehmkestraat en toegang is gratis.
Die volledige program is by lowvelder.co.za en kaartjies is te koop by Computicket.