Omgeegees skyn met jonges se liefdadigheid
MBOMBELA - Spandeer tyd, leer by mekaar en gee om. Dit is die les wat Hoërskool Bergvlam se 20 Mnr. en Mej. Bergvlam-finaliste Vrydag geleer het toe hulle hul tyd opgeoffer het om die middag saam met pasiënte van die organisasie Moving Mountains te spandeer.
Volgens die skool se skakelbeampte, Mandy Barnard, is dit net een van vyf uitdagings wat hulle moes voltooi.
“Vir ons is dit nie ‘n skoonheidskompetisie nie. Ons wil die leerders leer om vir ander om te gee en soveel as moontlik liefdadigheidswerk te doen.”
Die ander uitdagings wat elke finalis moes voltooi is om ‘n senior burger te bederf, ‘n middag saam met ‘n kind onder die ouderdom van 10 te spandeer en om ‘n onderwyser te bederf.
Die vierde uitdaging was dat elke paartjie ‘n liefdadigheidsorganisasie moes aanneem en nou saam met dié organisasie werk.
Die vyfde uitdaging het hulle dus Vrydagmiddag met ‘n groot glimlag voltooi.
Dit was egter nie net die finaliste wat van oor tot hoor geglimlag het nie, maar ook die pasiënte van Moving Mountains, ‘n organisasie wat hulle daarvoor beywer om finansieël en emosioneel tot kankerlyers se behandeling by te dra.
Een van die organisasie se kankeroorlewendes, George Round, het gesê dat hy die dag terdeë geniet het.
“Sommige van hierdie samekomste kan dikwels vervelig raak, maar nie in die geselskap van dié jong dames en here nie. Dit was iets anders en ek is so bly ek het gekom.”
Die pasiënte is bederf met allerlei lekkergoed, geskenke en ook ‘n dans- en sangitem van die skool se opkomende produksie Catz.
Dit was ‘n middag wat beide die finaliste en die pasiënte nie gou sal vergeet nie.