Maak seker jy is gedek
Wanneer hulle ‘n nuwe werk aanvaar, onderteken baie mense eenvoudig die kontrak sonder om genoeg aandag te gee aan die risikovoordele wat deel van hul dienskontrak uitmaak.
Selfs al geniet jy groepvoordele, bied dit dalk nie genoeg finansiële beskerming vir jou en jou gesin se behoeftes in geval van dood, ongeskiktheid of kritieke siekte nie.
Annatjie Els stel voor dat as jy ‘n werknemer is, jy die volgende moet doen:
Verstaan vir watter voordele jy gedek is. Jy moet ook weet vir watter bedrae, en in die geval van inkomstevoordele, vir watter tydperk jy gedek is.
Kry duidelikheid oor wanneer jou dekking moontlik gaan verander.
Vind uit onder watter omstandighede jy dalk nie meer vir sekere voordele soos lewensversekering in aanmerking kom nie. Vra wat die proses vir die benoeming van jou begunstigdes is. Vind uit wat die belastingimplikasies van jou groeprisikovoordelepakket is.
Doen navraag oor die buigsaamheid van jou maatskappypakket. Wat gebeur as jy jou werk as gevolg van personeelvermindering verloor, of as jy bedank of aftree? Word jou dekking beëindig, of kan jy dit omsit in ‘n individuele risikoversekeringspakket? Moet dit binne ‘n bepaalde tydperk geskied? Bestudeer die bepalings en voorwaardes van jou groepsrisikopolis. Is daar wagtydperke en moontlike uitsluitings? En wat is die definisie van elke risikovoordeel? Els sê dit is raadsaam om jou risikodekking te hersien wanneer ‘n belangrike lewensgebeurtenis ook al plaasvind. “Monitor jou voordele minstens een keer ‘n jaar om te verseker dat dit steeds voorsien in die behoeftes van diegene wat van jou afhanklik is.”
Kontak Annatjie Els by Catalyst BlouSter Finansiële Adviesdienste by 013-880-0061 of 083-679-4697 vir professionele advies.