Laaste kans vir NHS se Rhinos op die gesogte Virsekerbeker
Hoërskool Nelspruit se KMIA/ Land Rover Rhinos het in Saterdag se Virsekerbeker-kragmeting (plaatafdeling) op tuisfront hulle harte uit gespeel.
Dit was egter tevergeefs teen ‘n groter, sterker, hongerder Hoërskool Rustenburg wat deurentyd swakplekke in die Rhinos se verdediging gevind het, en beloon is met vier drieë en vier punte op die punteleer.
Dit het die tuisspan onder druk geplaas, en rotsvaste verdediging het boonop later talle hanteerfoute tot gevolg gehad.
Maar NHS was bittereinders en het nader aan die einde van die wedstryd al hongerder geword en nader begin kruip. ‘n Tipe wedstryd wat verwag sal word as die beker langs die kantlyn wink. Met ‘n oorblywende 10 minute was NHS se ondersteuners oorweldig met opgewondenheid toe Marthinus Cilliers oor die doellyn bars.
‘n Oorwinning was in NHS se visier, maar ‘n drie in die doodsnikke van die wedstryd het die koeël finaal vir Rustenburg deur die kerk gestuur.
Met ‘n eindtelling van 29
21 en slegs een bonuspunt op die leer, sit NHS nou met ‘n reuseverantwoordelikheid op hulle skouers. Met agt punte sit hulle in die voorlaaste posisie - net bo Zwartkop.
Hulle móét die volgende twee wedstryde wen, met bonuspunte, om uiteindelik ‘n kans te staan om die Virsekerbeker omhoog te hou. Onmoontlik? Die kans is skraal. Maar, as NHS met die hart speel waarmee hulle Saterdag gespeel het, minder strafskoppe afstaan en minder hanteerfoute maak, bons die bal dalk net in hulle guns.
Die Rhinos kom Saterdag teen Ben Vorster op NHS se velde te staan, wat tweede op die punteleer lê.
Volgende is Zwartkop op hulle tuisveld, wat laaste op die punteleer lê. Kan NHS ‘n haas uit ‘n hoed uittrek? Die wedstryde teen Ben Vorster begin om 08:00, op NHS se velde. Die halfeindrondes vind op 10 Augustus plaas. NHS se o/16’s het in dié reeks nog slegs een wedstryd verloor, en is tentatief deur na die halfeindronde. Voorlopig meet hulle kragte met Marais Viljoen wat vierde op die punteleer lê.
Hulle tweede en derde spanne lê derde. Hulle vierde span eerste, o/16 B’s eerste, o/15 A’s sewende, o/15 B’s vyfde, o/14 A’s vyfde en o/14 B’s sewende.
Die volledige bepalings van Saterdag se wedstryde sal aanlyn beskikbaar wees.