Gesellige kuier bring ’n bederfie of twee
MBOMBELA - Die uitbundige gelag en gesellige geselsies kon gehoor word soos ‘n mens Dinsdagoggend by die deure van SAVF Herfsakker binnegestap het.
In die saal was dit duidelik waarom: die Nelspruit Care Buddies het kom partytjie hou.
Die organisasie het ook bederfpakkies met toiletware en lekkergoed aan elke inwoner uitgedeel.
Die inhoud van dié pakkies is gedurende Mei deur die Nelspruit en Witrivier Care Buddies ingesamel en is vandeesmaand aan 600 bejaardes in verskillende ouetehuise uitgedeel.
Die oggend is afgeskop deur Judy Black wat met haar marionet genaamd Augustus, die inwoners in die saal vermaak het.
Daarna het Black en Augustus ook die pasiënte in die siekeboeg besoek.
Die inwoners is bederf met heerlike eetgoed en het land en sand met die Care Buddies en hul mede-inwoners gesels.
Die Nelspruit Care Buddies kuier egter elke week by die tehuis in die siekeboeg, by die Alzheimersafdeling, in die gange en ook by die inwoners wat in die kothuisafdeling woon.
Volgens die Care Buddies se verteenwoordiger by die tehuis, Althea Nicholson, hou hulle ook twee maal ‘n maand ‘n bingo-geleentheid by die tehuis. “Ons probeer ook om hulle op spesiale geleenthede te bederf. Ek het vanjaar met Paasfees byvoorbeeld vir almal paaseiers gebring.”
Een van die inwoners, Lydia Kotzé, het die geleentheid as baie gesellig beskryf.
“Hier was veels te veel eetgoed,” het sy geskerts. Sy het gemeen dit is die positiewe gees by die tehuis wat ook bydra tot die sukses van so ‘n geselligheid.
“Die Here het ons hier geplaas om te lewe en ons moet elke dag iets goed vir iemand anders doen. Tye soos hierdie is die perfekte geleentheid daarvoor.”