Pumas se hoofuitvoerende beampte gee duidelikheid oor nuwe borg
Die Pumas, deesdae beter bekend as die
Phakisa Pumas, speel al vir ‘n geruime tyd trots met dié maatskappy se logo op hulle bors en vanaand sal geen uitsondering wees nie. Alhoewel dit nog nie amptelik die Pumas se nuwe titelborg is nie, volg hierdie skuif nadat die voormalige borg, ISG Holdings, se kontrak met die Pumas weens beweerde kontrakbreek beëindig is.
Phakisa Holdings het aan die einde van 2018 aanboord gekom. Volgens die unie se hoofuitvoerende beampte, Pieter Burger, het die maatskappy aanvanklik ook belangestel in die titelregte, maar ISG Holdings het skriftelik eerste bevestig dat hulle die regte opneem. “Phakisa Holdings het dit duidelik gemaak dat hulle in die Pumas glo en ons wil ondersteun, en dat hulle tevrede sal wees met regte aan die unie (amateurkant) vir hulle kontraktermyn. Die vertroue in en geldelike bydrae tot die Pumas, toe ons dit nodig gehad het, het ongelooflik baie vir ons beteken. Die onselfsugtige houding van Phakisa om ten spyte van omstandighede, nog steeds betrokke te raak is ‘n testament van die kaliber van die individu, Johan Pretorius, en organisasie waarmee ons te doen het. Dit is ‘n ongelooflike maatskappy en ons hoop om nog ‘n lang pad met hulle te stap,” het Burger gesê.
Hy het verduidelik dat daar teen volgende week duidelikheid oor die presiese stand van sake sal wees. “Daar is nog geen formele bevestiging nie.
“Daar is tans ‘n bestaande ooreenkoms in plek van ‘n sekere waarde, maar ons hoop dat Phakisa sal instem om die titelregte en waarde oor te neem vir 2020 - dus opgradering van hulle borgskap en waarde,” het hy bygevoeg.
Burger sê dat die impak vir 2019 die Pumas se kontantvloei onder ongelooflike druk plaas, en dat die unie heel moontlik ‘n agterstand as ‘n resultaat mag beleef. “Tagtig persent van my vaste uitgawes is salaris-gebaseerd. Ons is in die vermaaklikheidsbedryf, en ek gaan kontrakte aan met personeel en spelers in lyn met ‘n begroting en prosedure wat in plek is. Ons het ‘n verpligting teenoor daardie werknemers en hulle gesinne.”
Die “kontrakteringsvenster” vir 2020 het
1 Julie oopgemaak, en die unie kon as gevolg daarvan nog nie aktief met onderhandelinge begin nie. “Dit plaas baie druk op spelers, hulle gesinne en die afrigters, omdat hulle onsekerheid ervaar oor ‘n tydperk waar hulle fokus en aandag op die Curriebeker moet wees. Dit is menslik en ‘n mens verstaan dit. Alles moontlik word gedoen van die veld af om ons in staat te stel om onderhandelinge so spoedig moontlik te begin en af te sluit,” het Burger gesê en bygevoeg dat dit onsmaaklik is, en baie jammer is dat dit tot op hierdie punt moes kom.
“Dit was absoluut ‘n laaste uitweg. Ons het alles van ons kant af gedoen om die saak te beredder. Ongelukkig is ons ‘n besigheid, en is daar gesinne wat afhanklik is van die kontraktuele inkomste wat borge op kontrak sluit.
“Phakisa Holdings gaan nog diep spore trap en nog groter sukses behaal in die toekoms, en hulle verdien elke oomblik daarvan. Ek sê dit nie omdat dit ‘n borg is van die Pumas nie, maar omdat ek dit persoonlik ervaar het. Ek het baie respek vir Pretorius en dit wat hy en sy span vermag het. Sy ondersteuning en onselfsugtige deelname by die Pumas word opreg waardeer deur elke personeellid en speler. Sonder vennote soos hierdie en talle ander wat ons droom deel, sal ons eenvoudig nie kan bestaan en