Hond glo met AK47 in NKW geskiet

SKUKUZA - Bewerings dat ‘n hond Saterdag in die Nasionale Krugerwildtuin voor toeriste met ‘n aanvalsgeweer van kant gemaak is, het diereliefhebbers die harnas ingejaag.

In ‘n Facebook-plasing wat oorspronklik deur James Jansen van Vuuren gemaak is, word daar beweer dat ‘n troetelhond Saterdag naby een van die wildtuin se hekke deur veldwagters doodgeskiet is. Die plasing is in die SANParks-Kruger National Parkgroep gedeel.

“Ons het ‘n bang hond sien hardloop langs die pad by een van die Krugerwildtuin se uitgangshekke. Omdat ons bekommerd was, het ons langs hom gestop. Agter die hond was ‘n Toyota Hilux met van die park se veldwagters in. Hulle het ‘n AK47 uitgetrek en die hond reg voor ons geskiet,” lui die plasing.

“Ons hele naweek is bederf en ons harte is gebreek. Ongeag of so iets toelaatbaar is of nie, jy doen dit nie in die oog van toeriste nie.”

Volgens die wildtuin se woordvoerder, Isaac Phaahla, het hulle reeds kontak met Jansen van Vuuren gemaak om te probeer vasstel presies waar die insident gebeur het.

“In die plasing praat hy van AK47’s, maar ons veldwagters dra nie aanvalsgewere by hulle nie en wanneer ‘n troeteldier ingang tot die park verky, word hulle op ‘n menslike wyse van kant gemaak.”

Phaahla verduidelik dat dit noodsaaklik is om diere wat van buite die park kom, genadedood toe te dien omdat hulle siektes in die park inbring.

“In 2015 het ons 12 wildehonde verloor omdat hulle in kontak gekom het met ‘n troetelhond wat siektes gedra het.”

Volgens Phaalha het Jansen van Vuuren nie kontak met hulle gemaak nie. Jansen van Vuuren het ook nie gereageer toe die koerant hom genader het vir kommentaar oor die voorval nie.