Dwelms en mensehandel onder die kollig
MBOMBELA - Min Suid-Afrikaners is bewus van die gewilde plaaslike akteur, Hykie Berg, se stryd teen dwelms en sy oorwinning oor verslawing.
Die akteur het Donderdagaand sy ervaringe met die gehoor by Communio Kerk gedeel. Die geleentheid was deur Francina du Plessis, eienaar van Creative Brains, in samewerking met Pediatric Care Africa, gereël.
Berg is ‘n bekende gesig op ons televisieskerms en het roem verwerf in reekse soos Egoli en Binnelanders.
Hy het egter onlangs die sluier gelig oor sy worsteling teen verslawing en in sy boek, Ultimate Survivor, vertel hy hoe hy op die hoogtepunt van sy loopbaan amper alles verloor het weens sy dwelmmisbruik.
Voordat Berg op die verhoog gestap het was Sylwia Michalak en Catherine Restiau aan die beurt. Hulle het gesels oor die gevare van mensehandel en hoe kinders en volwassenes daagliks geteiken word deur sindikate wat hul slagoffers in die mees aakligste omstandighede aanhou. Volgens Restiau word slagoffers verslaaf gemaak aan dwelms en gebruik vir seksuele doeleindes.
Berg deel prontuit in die boek hoe hy van die dw elm be dry wig he de in Hillbrow na ‘n maksimum sekuriteit-sel by Weskoppies Psigiatriese Hospitaal opgeneem is. Die gewilde akteur het uit sy hart gesels oor sy grootwordjare, die talle kere toe hy as jongmens in die moeilikheid beland het as gevolg van dwelmmisbruik en die punt toe hy besluit het om sy lewe te verander.
“Daar was baie kere toe ek mense beroof het om die monster wat dwelms is, te voer. Ek onthou toe my pa my na ‘n rehabilitasiesentrum neem en ek ‘n pakkie heroïne in my kouse versteek het. Dit was die keerpunt toe ek besluit het om my lewe aan God toe te wy,” het hy gesê.
Die gehoor het aandagtig geluister hoe die Survivor South Africa-wenner na ‘n bitter stryd verklaar dat sy lewe nou aan God behoort.
Michalak en Restiau het ook ‘n paar wenke aan ouers gegee wat dit moeiliker maak vir sindikate om kinders te ontvoer. Terwyl sy haar vingers omhoog hou het Restiau verder verduidelik: “Die duim beteken alleen wees. Dis belangrik dat kinders weet dat hulle ten alle tye naby vriende en familie behoort te wees.
“Die wysvinger is vir ouers om te besef hoe belangrik dit is om ten alle tye te weet waar hul kinders is, en die middelvinger simboliseer vreemdelinge. Kinders moet van kleins af leer om nie met vreemdeling te praat, of geskenke van hulle te ontvang nie.
“Die intieme vinger is die ringvinger. Ons kinders moet leer om nie intieme besonderhede op sosiale media te plaas nie.”
Sy het afgesluit met: “Die laaste vinger is die pinkievinger, wat simboliseer hoe sterk ons is en dat ons die stryd uiteindelik sal wen.”
Berg se ongelooflike verhaal het baie van die jongmense geïnspireer op die onvergeetlike aand, wat gehandel het oor ‘n onderwerp wat aktueel in ons land geword het.