Lydenburgse gilde skink wenwyn
Lydenburg Wynproewersgilde se naam sal voortaan op die 2018 Blaauwklippenwenbottel pryk, nadat hulle die wynlandgoed se 36ste Versnitkompetisie gewen het.
Die Blaauwklippen Wynlandgoed het 36 jaar gelede met die slim plan gekom om wynklubs in die land uit te daag om te help wyn maak.
Een keer per jaar kan wynliefhebbers hul lywe wynmaker hou en inskryf vir die heerlike uitdaging om uit vier rou wyne, volgens bepaalde voorskrifte, ‘n versnit aanmekaar te flans. Die wenversnit word dan deur Blaauwklippen gekies en in ‘n beperkte oplaag vervaardig en gebottel vir die mark.
Lydenburg se wyngilde het reeds 24 keer vir dié uitdaging ingeskryf en drie keer tussen die top vier finaliste beland. Maar vanjaar was die kroonjaar - toe die gilde aangewys is as die wenner uit 77 deelnemers van oor die hele land.
Die vier finalisklubs - twee uit die WesKaap, een uit Gauteng, en Lydenburg uit Mpumalanga - is onlangs op die pragtige Blaauwklippen-landgoed buite Stellenbosch luisterryk onthaal.
Voor die groot aankondiging het elk van die vier finaliste die geleentheid gekry om iets te sê van hul klub. Die klub se sekretaresse, Gerda Whitehorn, het
Lydenburg Wyngilde se 32 jaar-geskiedenis met die uitgelese wyndrinkers gedeel.
Op die feestafel was die wenwyn in Magnum-bottels met die bekende kunstenaar, Frans Groenewald, se etikette op. Jakkie Swanepoel en Brian Whitehorn het gesukkel om te glo dat die bottel hul resep bevat.
Agterop die 2018 Blaauwklippenwenbottel staan daar nou: Hierdie meesterlik vervaardigde versnit deur die Lydenburg Wynproewersgilde met 48 persent Zinfandel, 32 persent Merlot, 10 persent Petit Verdot en 10 persent Shiraz, is gekies as die wenner uit 77 deelnemers en slegs ‘n beperkte oplaag van 1 200 bottels is geproduseer.