Witrivier groet sy ‘lelie van die veld’
WITRIVIER - ‘n Jarelange en welbekende inwoner van die dorp, Susanna Johanna Oosthuizen, is op 23 Junie na ‘n ryk lewe op die ouderdom van 99 oorlede.
As stigterslid het sy bygedra tot die oprigting en bedryf van Rustig Senior Oord, waar sy ook haar laaste jare spandeer het. Oosthuizen was onder andere vir 50 jaar ‘n bekroonde lid van die plaaslike tak van die Suid-Afrikaanse Vrouefederasie (SAVF) en die stigterslid van die Silwer Seniors.
Boonop was sy toegewyd aan NG Kerk Witrivier, en waar ‘n ontfermende hand nodig was, by die kerk, die skool, die kinderkrans of Voortrekkers, het sy altyd ingestaan.
“Vele kinders van die dorp van die jare
60s tot 90s het haar by die kinderkrans teëgekom en het sekerlik ten minste een van haar pannekoeke by ‘n sportbyeenkoms geniet,” het die familie gesê.
Susanna (wat “lelie van die veld” beteken) is op 18 Januarie 1921 in Paul Krugerhuis,
Kerkstraat, Pretoria as ‘n Van der Vyfer gebore. Die Van der Vyfers het later na Vereeniging verhuis. Daar het sy haar man, Lambertus Oosthuizen - beter bekend as Oosie - ontmoet en hulle is daar getroud. Oosie en Susanna het saam met hulle twee seuns in 1957 na Witrivier verhuis waar hulle in die diens van die plaaslike owerheid was.
Susanna het later by Terblanche Transport gewerk en die talle boere in die Kiepersol/Burgershall-gebied het altyd net lof en waardering gehad vir die aandag wat sy aan hulle sake gegee het.
Met hul aftrede het Oosie en Susanna in Macadamia Aftreeoord gewoon en vandaar is Oosie oorlede. Sy het haar verblyf by Macadamia onthou as van die beste jare van haar lewe.
“’n Lelie was sy beslis. In haar optrede teenoor haar gesin en in die gemeenskap het sy haar teenwoordigheid met waardigheid gestalte gegee. Sedert sy in 1957 na Witrivier verhuis het, het sy onbaatsugtig vir die verbetering van die dorp en dié se mense gewerk. Haar credo was:
“Wees opreg, mededeelsaam, eerlik, en as daar nie iets goed van iemand gesê kan word nie, handhaaf stilte”. Haar godsdiens was vir haar belangrik en ‘n anker in haar lang lewe. Hierdie Bybelvers was een van haar gunstelinge Johannes 13:34: “Ek gee julle ‘n nuwe gebod: julle moet mekaar liefhê. Soos Ek julle liefhet, moet julle mekaar ook liefhê.”
“Ons familie het ‘n ouma, ‘n ma en ‘n vriend verloor. Sy laat ook talle vriende en kenisse agter wat na haar liefde en haar glimlag gaan verlang.”
Haar credo was: ‘Wees opreg, mededeelsaam, eerlik, en as daar nie iets goed van iemand gesê kan word nie, handhaaf stilte’