Virtuele skouspel ’n eerste vir Hoërskool Bergvlam
MBOMBELA - In 'n onbetwiste eerste vir die Laeveld, gaan vanjaar se Mnr. en Mej. Bergvlam heeltemal 'n virtuele skouspel wees. Dit beteken dat alles wat die kompetisie behels, aanlyn gedoen sal word.
Die Vlammies se skakelbeampte, Mandy Barnard, vertel: "Ons inskrywings is aanlyn, ons onderhoude is aanlyn, ons vergaderings en oefeninge is aanlyn. Selfs die beoordeling is aanlyn!"
Volgens Barnard is hierdie die negende jaar wat Yolandie O'Reilly die organiseerder vir die byeenkoms is.
"Temas het al ingesluit 'Disney-prinse en -prinsesse', 'Sirkus', 'The Great Gatsby' asook die elemente (vuur, water, wind en aarde). Mnr. en Mej. Bergvlam is reeds al meer as 20 jaar deel van Hoërskool Bergvlam se ryk geskiedenis," het sy bygevoeg. Soos in die vorige nege jaar gaan daar steeds uitdagings aan die deelnemers wees.
"Dit sluit steeds 'n liefdadigheidsprojek in wat gemik is op ons eie gemeenskap wat die Bergvlam-beginsel van ubuntu verteenwoordig. Verlede jaar het die deelnemers kragte saamgespan met Moving Mountains en vir hulle kankerpasiënte elkeen ‘n pakkie opgemaak, wat ‘n kniekombers, waterbottels en 'n koffiebeker vir die lang dae tydens behandeling ingesluit het," het Barnard bygevoeg.
As gevolg van die virtuele formaat sal baie van die uitdagings video-opnames insluit, wat hand aan hand gaan met die Covid19-pandemie.
Dit sal natuurlik hande was, ontsmetting en maskers dra as fokuspunt insluit.
Sy het ondersteuners aangemoedig om op die uitkyk te wees vir die leerlinge se TikTok-videos.
"Ons wil graag weer ons beoordelaars van Ramps to Runway, Manda Gomes,
Mej. Mpumalanga-organiseerder, Jacques Lombaard en Brenda Botha Thambe van MUD South Africa aan boord hê vir hierdie geskiedkundige byeenkoms."
Omrede die kompetisie vanjaar virtueel is, het die organiseerders die besluit geneem dat die gr. 10-, 11- en 12-leerders ook mag deelneem.
Volgens Barnard kan alle inskrywings op die skool se aanlynklas, Moodle, gedoen word.
"Leerders word genomineer om in te skryf, maar daar is ook geleentheid vir dié wat dink hulle is reg vir hierdie uitdaging om self te kan inskryf," het sy gesê.
O'Reilly het gesê dat Mnr. en Mej. Bergvlam-finaliste ambassadeurs vir die skool se waardestelsel is.
"Dit is 'n baken van lig vir die gemeenskap en vir hul eweknieë. Hulle leer om kreatief te wees en aan te pas by situasies buite hul gemaksone.
"Hoewel dit welbekend staan as 'n glansgeleentheid, is dit soveel meer as 'n skoonheidskompetisie.
"Dit leer leerders om hul innerlike skoonheid te gebruik om ander te bevoordeel, omdat ons groei deur ander te ondersteun."