Vroue ontdek die fynere kuns van koekversier
WITRIVIER - Buite die dorp kan jy by Willemien Strydom aanklop om meer oor koekversier te leer. Jy sal met nuwe vaardighede én ’n internasionaal erkende sertifikaat daar uitstap.
Strydom het die afgelope naweek ’n tweedag kursus by El Roi Gastehuis aangebied. Elf vroue het die geleentheid bygewoon; sommiges om te help met koekversier vir hul kinders se verjaarsdae, en ander om hulle ’n hupstoot in die besigheidswêreld te gee.
Sy is ’n gekwalifiseerde chef en fyngebakchef en bied al vir vyf jaar die klasse aan. Sy is ook by Wilton geregistreerd as ’n WMI (Wilton Method Instructor). Volgens haar is daar slegs vyf WMI’s in Suid-Afrika. Hierdie opleiding het sy in Kanada ontvang waar sy voorheen ’n hoof-fyngebakchef was.
“Ek het met die klasse begin om my passie vir koekversier met ander te deel. Dit is bevredigend om my kennis te kan deel en ‘n verskil in iemand se lewe te kan maak. Die meeste vroue stap by my klas in met geen ondervinding, en dis ongelooflik om hulle te sien floreer en om vir hulle die selfvertroue en kennis te gee om pragtige koeke te kan maak.”
Na so ‘n naweek sal jy algeheel vier kursusse bygewoon het, wat elkeen vier ure duur. Deelnemers leer onder meer hoe om verskillende blommetjies te maak, verskillende punte te gebruik en hoe om met verskillende konsekwenthede van versiersel te werk.
Elmarie Strydom was daar om haar vaardighede van verjaarsdagkoekversier op te skerp. “Ek doen dit vir my seuns wanneer hulle verjaar, dan hoef ek nie altyd iemand te vra om dit vir my te doen nie.”
Een van die ander bywoners, Nomfundo Zulu, doen dit vir haar besigheid. “Ek het reeds met my besigheid begin, maar ek probeer my vaardighede vervolmaak.”
Meer inligitng is beskikbaar op die Facebook-blad, Wilton Cake Decorating Classes by Willemien.