Vlam Els ernstig beseer toe opleidingsvlug skeefloop
MBOMBELA - ’n Welbekende inwoner is Vrydag ernstig beseer toe ’n opleidingsvlug net buite die stad skeefgeloop het.
Vlam Els (49), die bedryfsbestuurder van Netstar en ’n bekende gesig by die Mbombela-stadion, het Vrydagmiddag skaars opgestyg toe hy beheer oor sy motoraangedrewe valskerm verloor en neerstort.
Els het volgens ER24 se nasionale woordvoerder, Russel Meiring, ernstige beserings aan sy regterknie en linkergewrig opgedoen en sterk tans by Mediclinic Nelspruit aan. Die voorval het omstreeks 18:00 plaasgevind.
Volgens ooggetuies, waaronder bekende televisiepersoonlikheid en kranige skermswewer, Eugene
Cussons, het Els se valskerm kort nadat hy opgestyg het heen en weer begin beweeg. Els het glo probeer om die valskerm onder beheer te bring en het kort daarna in ’n poging om ’n noodlanding te maak, afgeduik aarde toe.
Omstanders, waaronder ’n bekende plaaslike dokter en ander vlieëniers, het na die toneel gehaas om Els te hulp te snel. By hulle aankoms was hy by sy volle bewussyn en in ’n goeie bui.
Els het glo probeer om sy valskerm onder beheer te bring en ’n noodlanding te maak
Hy is aangesê om stil te lê totdat hulp opdaag. Met ER24 se aankoms het noodpersoneel pynmedikasie toegedien waarna die omtanders Els na die ambulans help dra het.
Els was onder leiding van ervare en gerespekteerde instrukteur, Colin Tapson, wat daardie dag ’n kursus by Cussonia Vliegveld, naby Chimp Eden, aangebied het. Tapson het die voorval bevestig en gesê dat Els breuke aan sy regterarm en linkerbeen opgedoen het, maar wou nie veel oor die voorval uitbrei totdat Burgerlugvaart se ondersoek afgehandel is nie. ’n Woordvoerder van Burgerlugvaart, Kabelo Ledwaba, het bevestig dat hulle kennis dra van die voorval. “Wat ek wel kan sê is dat Els goed aansterk en gretig is om weer te vlieg,” het hy gesê.
Els was nog teen ter perse gaan nie in staat om met Laevelder te gesels nie.