Vlammies vier pi met ’n ‘paai’
MBOMBELA - Hoërskool Bergvlam het vroeër vandeesmaand vir die sewende agtereenvolgende jaar Pi-dag gevier met 262 Vlammies wat elkeen ’n pi-T-hemp, ’n pastei en ’n koeldrank by hulle wiskundeonderwysers bestel het.
Joan van Tonder, hoof van wiskunde by Hoërskool Bergvlam, is sedert 2014 betrokke by die vieringe en sê die geleentheid groei elke jaar.
Pi-dag word regoor die wêreld gevier op 14 Maart (3/14). Pi is ’n wiskundige konstante wat die verhouding van ’n sirkel se omtrek tot sy deursnit voorstel. Die Griekse simbool π word in wiskunde gebruik vir die verhouding. Pi is al bereken tot oor ’n triljoen syfers na die desimale komma, en as ’n irrasionele en transendentale syfer sal dit oneindig voortgaan sonder herhaling of ’n patroon.