Trekkerrit deur vyf provinsies word beplan vir liefdadigheid
LYDENBURG - Groot opgewondenheid heers reeds by Soli Deo Gloria Sorgsentrum. Pediatric Care Africa (PCA) het laat weet dié sentrum is een van die plekke waar die “On TrackTor”-trekker gaan stop tydens sy 2 500 km-rit deur vyf provinsies.
John Deere Suid-Afrika en Mascor in Rocky Drift buite Witrivier het die PCA geborg met ’n splinternuwe John Deere 6095B-trekker. Die rit het dit ten doel om fondse vir siek kinders wat mediese behandeling en operasies moet ontvang, in te samel.
Dit begin Sondag 2 Mei om 09:00 by die White River Square en eindig weer daar op Saterdag 15 Mei om 13:00.
Die PCA wil met hierdie projek ten minste R250 000 insamel.
Dr. André Hattingh, die stigter van die PCA, kan per kilometer geborg word of ’n eenmalige skenking kan gemaak word. PCA doen ’n beroep op alle boere-unies en organisasies langs die trekkerroete vir hulp. Hospitale en dokters kan die organisasie help met pro bono-behandelings of -operasies vir die kinders wat deur die organisasie ondersteun word.
Die trekker doen Sondag 2 Mei in Lydenburg aan en skenkings kan dan daar vir die projek gemaak word.