Geniet Innibos in jou huis
MBOMBELA - Met sy rasperstem en sielvolle lirieke het Roan Ash beslis ’n paar nuwe aanhangers bygekry toe hy onlangs tydens ’n Innibos In jou huis-konsert opgetree het.
Die gehoor, gaste van Marius en Lana Nel, het die vertoning terdeë geniet en luidkeels saamgesing.
Die luisteraars op 100.5 FM het ewe lekker saamgekuier en het vir Ash ’n paar interessante vrae gehad. Een luisteraar wou weet of sy hom aan haar baie mooi dogter kon voorstel, waarop hy lekker gelag het en gesê het dat hy reeds getroud is.
Die gasheer en -vrou by elke Innibos
In jou huis-konsert besluit aan watter gemeenskapsorganisasie hulle graag die fondse wat hulle tydens die konsert by gaste ingesamel het, wil skenk.
Lana en Marius is jare reeds as vrywilligers by KANSA betrokke. Lana het self ook een van haar ouers aan kanker verloor. KANSA bied ondersteuningsdienste aan kankerlyers asook familieondersteuningsgroepe.
“KANSA ontvang geen staatsbefondsing om hierdie belangrike werk te doen nie en is afhankilik van die gemeenskap se ondersteuning om hul dienste te lewer. Daarom is ons ongelooflik dankbaar vir skenkings soos dié,” het Pauline Möller, ontwikkelingskoördineerder van KANSA, gesê toe Marius en Lana die fondse oorhandig het.
Omdat mense nie kaartjies koop om die Innibos In jou huis-konserte by te woon nie, vra die gasheer hulle om ’n bydrae te maak vir hul gekose organisasie. “Die gaste het die Roan Ash-konsert geweldig geniet, en ons is opgewonde dat ons R12 000 kon bymekaarmaak,” het Lana gesê.
Charl du Plessis tree by die volgende In jou huis-konsert op wat op Saterdag 26 Junie plaasvind.