Pretloop met Kinderbeskermingsweek samel fondse in
MBOMBELA - Friend’s Café het gewemel van drawwers en stappers vroeg Saterdagoggend.
Almal het hulself gereedgemaak vir die pretloopwegspring. Die deelnemers kon kies tussen afstande van 10 km, 5 km en 1,8 km.
Die Christelike Maatskaplike Raad (CMR) Nelspruit het hierdie dag gereël met die doel om fondse in te samel vir hul kantoor, asook om bewusmaking te skep vir die dienste wat die raad lewer.
Een van CMR se maatskaplike werkers, Christel van Tonder, het gesê hulle het die geleentheid van Kinderbeskermingsweek gebruik omdat hulle ’n kinderbeskermingsorganisasie is.
“Met grendeltydperkregulasies kon ons nie ons normale fondsinsameling doen nie, en baie van ons maandelikse donateurs het onttrek of hulle bydrae verminder.
“Ons kantoor het ’n tekort van ongeveer R300 000 vir die jaar. Ons is geregistreer as ’n nie-regeringsorganisasie en sonder die finansiële ondersteuning van die gemeenskap sal ons nie ons deure kan oophou nie, en so ook nie ons dienste aan die gemeenskap kan lewer nie.”
Van Tonder het gesê die eerste pretloop Saterdag was ’n reusesukses. “Met enige fondsinsamelingsprojek wil jy soveel as moontlik mense hê, en ons is baie dankbaar oor almal wat deelgeneem het.”
Hulle is veral dankbaar teenoor OCR Nelspruit en Core 360 klubs wat help reël het aan die dag.
CMR beplan om die pretloop jaarliks aan te bied, of dalk selfs tweemaal per jaar, maar hul huidige fokus is ’n visvangkompetisie. “Dit is alles nog in die beplanningsfase. Mense kan ons Facebook-blad, CMR Nelspruit, dophou om te sien wanneer dit gaan gebeur,” het Van Tonder gesê.