Radiodramaslypskool deur Innibos en RSG lewer hope kreatiewe idees

KAAPSEHOOP - Die inspirasie en kreatiewe woordskeppings het tydens Innibos en RSG se radiodramaslypskool gevloei.

Dit is verlede week op dié dorpie gehou, onder leiding van Kobus Burger, die waarnemende programbestuurder van RSG.

Burger het die deelnemers behoorlik uitgedaag om op allerhande maniere aan hul woordskeppings in klank gestalte te gee. Verhaallyne, tegniese aspekte van die radiodrama en hoe om ’n radiogehoor onmiddellik “aan die ore te gryp”, was van die temas wat onder die loep gekom het.

“Die werk wat deur die deelnemers gelewer is, was van ’n uitstaande gehalte,” sê Burger.

“Ek hoop waarlik dat ons binnekort verskeie volwaardige radiodramas uit diegene se penne sal hoor.”

Die slypskool is met ’n sessie oor storievertelkuns deur Leonore Zietsman van Mbombela afgesluit.

’n Borgskap van die Nasionale Afrikaanse Teaterinisiatief het die slypskool moontlik gemaak.

Agter: Kobus Burger, (boonste trap) Frances van Niekerk, Thea Boshoff, (middelste trap) Veronica van der Walt, Christell Olckers, Alita Steenkamp, (voor) Nadia Schwirzer, Louise Schoeman, Lizette van der Merwe en Annemarie van der Walt.

Philna Scholtz, Leonore Zietsman, Kobus Burger en Annemarie van der Walt.