Finaliste kleur glansgeleentheid in
MBOMBELA - Met vanjaar se Mnr. en Mej. NHS, was daar weer eens nie ’n tekort aan vermaak, glans en opwinding nie.
Twintig deelnemers én die Afrikaanse sangsensasie, Appel, het op 18 Augustus die gehoor se voete behoorlik laat jeuk.
Die beoordelaars, Monique de Villiers, George du Toit, Jacques Lombard, Helgard Lourens en Lynmarie Griffioen, het glad nie ’n maklike taak gehad nie.
Die deelnemers het hul advertensies vir die hoofborge uiters kreatief uitgebeeld (party mag dalk selfs ’n toekoms in die kunste hê), en dan het hulle ook nog spoggerig in formele drag gepronk.
Elke finalis se formele aanddrag is spesiaal deur Griffioen gemaak. Die kledingstukke het nie net die tema, wit en swart met ’n titsel kleur, uitgebeeld nie, maar ook so ’n bietjie van elkeen se persoonlikheid.
Elke deelnemer het reeds voor die geleentheid Kerry-Lee Wiehman se ateljee besoek waar daar kreatiewe foto’s van hulle geneem is. Hulle het intussen borge gewerf, stemopnames en uitbeelding van reklameadvertensies gedoen en geleer hoe om hulself op die loopplank te handhaaf.
Die paneel beoordelaars het punte vir elke afdeling toegeken en hiervolgens is die wenners aangewys:
Mnr. en Mej. NHS: Zander Schoeman en Zoe Scheepers
• 1ste Prins en Prinses: Neelsie van Dyk en Ronel Basson
• 2de Prins en Prinses: Owen Steyn en Ashley Erasmus
• Mnr. en Mej. Fotogenies: Ian Wood en Ané van Niehaus
• Debutant van die jaar: Marco Smith.
Die skool het die komitee onder leiding van Kriekie Bekker hartlik bedank vir hul harde werk agter die skerms om hierdie produksie op die planke te bring.
’n Groot dankie van NHS se kant af gaan ook na al die hoofborge en diegene wat verantwoordelik was vir die mooimaak van die deelnemers. Sonder hulle sou die geleentheid nie moontlik gewees het nie.