Musiekkonsert samel oor die R16 000 vir hospice in
MBOMBELA - Op Sondag 14 Augustus het die Gereformeerde Kerk Nelspruit ’n pragtige musiekkonsert, Lied Lof Lewe, ten bate van Nelspruit Hospice aangebied.
Die konsert was só ’n reusesukses dat die kerk ’n allemintige R16 040 tydens die geleentheid ingesamel het.
Die deelnemers was gewillige plaaslike orreliste en kore wat hul talente gratis aangebied het ten einde die middagkonsert moontlik en onvergeetlik te maak.
Marietjie de Jager, die gemeente se orrelis, het die middag met sagte orrelspel ingewy. Alta van Zyl, Herman van Duyker en Reon van Aardt het die gehoor behoorlik met ’n verskeidenheid liedere bederf wat op die kerk se besonderse pyporrel uitgevoer is.
Laerskool Nelspruit se seniorkoor, onder leiding van Isabel van Veenhuysen, en Hoërskool Nelspruit se Bel Canto Meisieskoor, onder leiding van Elet Kruger, het uitmuntende koorsang gelewer.
Die middag is met koffie, tee en koeksisters afgesluit. Die kerk het Konica Minolta as hoofborg bedank, asook plaaslike entrepreneurs, Krummels en Kroos en Marja Meraai.