Een persoon word 15 in Innibos-teaterstuk
MBOMBELA - So kom Innibos se Teaterweek tot ’n einde en die stad se mense is weer so 'n tikkie teaterkultuur ryker.
Hans steek die Rubicon oor was die eerste om dié week op 1 September by die Mbombela Stadsteater af te skop.
Charlie Bouguenon was die ster van hierdie eenmanvertoning gebaseer op die skrywer, Rudie van Rensurg, se topverkoper van dieselfde titel.
Met Francois Toerien se verwerking en Lizz Meiring se regie het Bouguenon nie net die hoofkarakter, Hans, se skoene volgestaan nie, maar ook dié van 15 ander karakters.
Met die blote verandering van sy gesigsuitdrukking en lyftaal het hy voor die gehoor se oë konstante gedaanteverwisselings ondergaan - daar was geen twyfel oor watter karakter hy op ’n spesifieke tydstip vertolk het nie.
Vir ’n man wat aan 40 se deur klop, het hy ’n baie oortuigende inwoner van Huis Madelief, ’n huis vir bejaardes, gemaak.
Die matrone van dié huis se diktatorskap het vinnig onder Hans en sy bende se streke getuimel; soveel so dat hardkoppige Hans, wat eens op ’n tyd alles in sy vermoë probeer het om uit die “tronk” te ontsnap, vasberade is om nou daar aan te bly en sy rol as die leier van sy nuut gestigte party, die Progressiewe Organisasie vir die Emansipasie van Patriotte (POEP), vol te staan.