Wen lekker pryse by Innibos-kompetisies
Die Innibos Buitelug Familiefees, wat vanaf 30 September tot 1 Oktober by Kwanyoni Lodge net buite die stad plaasvind, bied twee lekker kompetisies aan waaraan feesgangers kan deelneem om heerlike pryse te wen.
Mans en dames met mooi bene word genooi om te kom beenwys in die Boerboel Bene Kompetisie. Diegene met mooi gedefinieerde kuite, lenige lang bene of kriewelspiere in hul bobene moet beslis oorweeg om in te skryf. Alle SuidAfrikaners bo die ouderdom van 16 jaar kan inskryf, maar die vereiste is dat jy die Innibos Buitelug Familiefees op Saterdag, 1 Oktober, om 16:00 moet bywoon.
Die bul en aster met die mooiste bene kry elk ’n Boerboel Wear-geskenkbewys ter waarde van R2 000 en ’n R1 000kontantprys met die komplimente van Innibos Kunstefees.
Inskrywingsvorms is reeds op die Inniboswebwerf, www.innibos.co.za, beskikbaar en inskrywings sluit op 20 September. Voornemende deelnemers moet die vorm voltooi en saam met ’n hoë resolusie vollengte foto van hulself na adelene@ innibos.co.za stuur. Die finaliste sal op 26 September in kennis gestel word en geniet gratis toegang tot die feesterrein by Kwanyoni vir Saterdag.
Daar is ook ’n kompetisie waar baardmanne kan kom uithaal en wys.
Dié kompetisie vind om 12:00 op die Saterdag by die KykNET-verhoog op die feesterrein plaas.
Die man met die langste baard kry ’n R1 000-kontantprys met komplimente van Innibos, plus ’n geskenkpak van ’n drankborg.
Die man met die woesste baard kry ook ’n R1 000-kontantprys van Innibos plus ’n geskenkpak van Rooibaard. Dan kry die man met die mooiste baard ook ’n R1 000-kontantprys plus ’n geskenkpak van Buffelsfontein Baardolie.
“Daar is nog ’n paar weke oor voor die sluitingsdatum, so vertroetel jou baard so ’n bietjie en laat die inskrywings inrol,” sê Adelene Niehaus, die kompetisiekoördineerder.
Inskrywings sluit op 20 September. Die inskrywingsvorm en kompetisiereëls is ook op die Innibos-webwerf beskikbaar, of jy kan adelene@innibos.co.za vir meer besonderhede kontak.
Die finaliste sal op 26 September in kennis gestel word en sal ’n gratis Saterdag-toegangskaartjie tot die fees kry. Die kompetisie word om 12:00 Saterdag by die KykNET-verhoog op die feesterrein beoordeel.
Hierdie kompetisies is deel van ’n stampvol naweek van aktiwiteite en vermaak en beloof om baie pret te wees. Daar is hope uitstallers, verskeie gewilde KykNET-akteurs en die Pumas gaan daar wees, daar is ’n aktiwiteitsprogram vir kinders, buitelugaktiwiteite en ’n verhoogprogram waar sangers soos Snotkop, Bernice West, Ricus Nel, IreneLouise van Wyk en Refentse, onder andere, optree. Kaartjies is by Quicket beskikbaar. Vir meer inligting, besoek www.innibos.co.za.