Geniet vanjaar dié buitelugdinge saam met Innibos
Prettige aktiwiteite vir die hele gesin is presies waaroor Innibos se Buitelug Familiefees oor twee weke by Kwanyoni Lodge gaan.
Daar is iets vir elke smaak en ouderdom. Die fees skop Vrydagmiddag, 30 September, om 15:00 af wanneer die hekke open. Kaartjies kos R100 en is vooraf by Quicket te koop. Pensioenarisse betaal slegs R50 en toegang is gratis vir voorskoolse en laerskoolkinders.
Sommer met die wegspringslag kan die jongspan aan ’n skattejag met lekker kopkrapleidrade deelneem en allerlei pryse in die sak steek. Die kinderarea is naby die kuierstoep van Kwanyoni Lodge, en die res van die naweek sal daar verskeie opwindende doendinge aangebied word alles gratis.
Om 16:00 hou Nitali Re-Invented Decor ’n demonstrasie op die kuierstoep van hoe om van weggooigoed mooigoed te maak, onder meer deur Tjoko Paint te gebruik. Kom leer waarom dit nie ’n huis se prys hoef te kos om jou huis goed te laat lyk nie.
In die Klipspringer-buitelugarena kan daar onder andere aan boogskiet, teikenskiet en ’n oulike bestuuruitdaging teen ’n geringe fooi deelgeneem word.
Van 17:00 tot 18:00 is dit feesgangers se kans om verskeie bekende kykNET-akteurs sommer daar op die kuierstoep van aangesig tot aangesig te ontmoet, en om 18:00 begin die joligheid by die musiekverhoog saam met 0260 Duo, Reën, Jan Jan Jan, Bernice West en Ricus Nel.
Saterdag open die hekke om 10:00. Kaartjies vir dié voldag kos R150 vooraf by Quicket en R50 vir pensioenarisse. Jong kinders kan dit steeds gratis bywoon.
Kom snuffel op jou tyd deur die talle stalletjies, en maak seker jy loop nie die opwindende kuierstoepprogram mis nie. Kom leer hoe om wors te maak saam met Bergendal Slaghuis, vis te vang saam met die manne wat wéét hoe, hoe om herwinde artikels in te span om ’n tafel mooi te maak saam met Nitali, of kom kyk of jy die kykNET-sterre met jou koekversiertalent kan klop. Riaan Loubser gaan met die koppe smokkel as The Mentalist, en die gewilde rubriekskrywer Blouwillem Theron kom vertel staaltjies en gesels met ’n paar Pumasspelers.
In die boma is dit tyd vir ’n whiskyproe om 12:00, waarna jy ’n foto kan laat neem saam met die Pumas-spelers en die Curriebeker. Sluit die dag af met ’n skemerkelkie-demo en -kompetisie.
Musiek uit die boonste rakke sluit die fees op ’n hoë noot af: Mbombela se eie Coenie Naudé word deur Droomsindroom, Refentse, Irene-Louise van Wyk, Snotkop en Soul Taxi gevolg.
Kaartjies moet vooraf by Quicket gekoop word. Gaan na https://qkt.io/fwSXEL vir die Vrydagkaartjies en https://qkt.io/4gBTsD vir Saterdag se kaartjies. Die volledige program is ook op innibos.co.za beskikbaar.
Onthou:
Daar is nog tot 20 September kans om vir die Boerboel-benekompetisie in te skryf, asook vir die baardkompetisie. Groot pryse kan losgeslaan word. Inskrywingsvorms is op die Inniboswebwerf.