Deeglike finansiële beplanning moet gedoen word voor eerste kind

Die aankoms van jou eerste kind is een van die mees opwindende tye van jou lewe.

Dit is dus noodsaaklik dat ouers die tyd neem om finansieel voor te berei, omdat hierdie lewensfase ’n groot impak op jou gesinsbegroting kan hê.

Ouers behoort ’n holistiese finansiële plan op te stel sodra hulle weet dat hulle ’n baba verwag.

Hierdie plan moet ’n reeks kritieke gebeurtenisse dek en moet in oorleg met jou lewensmaat, werkgewer, verskaffer van jou mediese skema en finansiële adviseur opgestel word.

Hier is ’n lys van verskeie maniere om finansieel (en meer algemeen) vir jou baba voor te berei:

• Voor swangerskap

Voor swangerskap behoort paartjies seker te maak dat hulle die regte soort mediese skema het om die soort sorg wat hulle gedurende swangerskap, barensnood en ná die geboorte verwag, te verseker. Sommige mediese skemas hef bybetalings as jy nie die regte mediese skema-opsie het nie.

• Swangerskap

Eerste trimester

Kry ’n ginekoloog met wie jy gemaklik is en maak seker hul pryse is mededingend. Begin vir groot items, soos ’n nuwe stootwaentjie en bababed, spaar. Jy kan dit selfs oorweeg om na goeie tweedehandse items te begin soek.

Gedurende hierdie trimester kan jou dokter moontlik aanbeveel dat jy bykomende aanvullings, soos Omega 3, kalsium en multivitamiene, begin gebruik. Daar is produkte wat spesifiek vir swangerskap ontwikkel is en dié kan tot R300 vir ‘n maand se voorraad kos.

Tweede trimester

Moenie al jou baba-aankope - van dit wat noodsaaklik is tot dit wat jy graag wil hê - op een slag doen nie. Jy het dikwels minder nodig as wat jy dink. Ignoreer die jongste tendense op Pinterest, Instagram en TikTok en gesels liewer met jou vriende en familielede om uit te vind watter babaproduk vir hulle goed te pas gekom het.

Gesels met jou menslikehulpbronbestuurder en maak seker jy verstaan jou swangerskapsvoordele ten volle.

Maak gereed om WVF te eis. Afhangende van jou maatskappy se beleid kan jy verwag om slegs ‘n gedeelte van jou bruto salaris vir ’n maksimum van vier maande te ontvang. (Daar is agentskappe wat jou met die administrasie van jou WVF-eis kan help.)

Derde trimester

Maak seker of hierdie opsie ‘n voordeel van jou mediese skema is.

Covid het ons geleer om kreatief te wees en aan te pas. Oorweeg dit om ‘n digitale of verbyry-babatee te hê met vriende en familielede wat die noodsaaklike babaitems vir jou sal koop.

Hou kwitansies van alle aankope - jy kan items soos ongebruikte doeke vir ‘n groter grootte omruil as jou baba dit ontgroei. Vind by jou mediese skema uit hoe lank jy in die hospitaal sal kan bly en wat deur jou plan in- of uitgesluit word.

• Geboorte

Maak seker jou geboorteplan is duidelik vir jou ginekoloog, die hospitaal en jou lewensmaat.

Onthou, sake verloop nie altyd volgens plan nie, dus moet jy aan verskillende scenario’s en die finansiële implikasies daarvan dink. ’n Keisersnee, byvoorbeeld, is geneig om meer as ’n “normale” geboorte te kos.

Oorweging van finansiële implikasies is veral belangrik waar spesifieke diensverskaffers, soos ‘n ginekoloog, narkotiseur of pediater, meer as medieseskematariewe vra.

As jy nie lid van ’n mediese skema is nie, sal jy ’n groot som geld moet spaar om vir ’n keisersnee of ’n natuurlike geboorte in ’n privaat hospitaal, afhangende van die hospitaal, voorsiening te maak. Maar moenie van enige bykomende koste vergeet nie. Indien jou baba ekstra versorging in die hospitaal benodig, soos behandeling vir geelsug, kan dit jou hospitaalrekening opstoot.

Hou jou babasak eenvoudig - jou baba sal in elk geval die hele tyd hospitaaldrag aanhê.

• Ná die geboorte

Kontrolelys

Monitor jou fisieke en emosionele welstand en wees bedag op tekens van nageboortelike depressie.

Maak seker jy het gedurende die eerste paar weke genoeg hulp.

Dis maklik om aan te neem dat jy ná die geboorte van jou baba dieselfde persoon sal wees as wat jy aan die begin van hierdie reis was. Die werklikheid is egter dat jy, én jou omstandighede, verander het. Deeglike finansiële beplanning vir elke tree van die pad sal dit vir jou moontlik maak om hierdie spesiale tyd te geniet soos wat jy bedoel is om te doen.