Ombudsman ondersoek Rob Ferreira vir nalatigheid
MBOMBELA - Haar maande lange stryd om oorlewing van kanker, en haar hoop om beter mediese behandeling vir ’n massiewe septiese wond op haar regterbors by Rob Ferreira Hospitaal te kry, het nou in ’n veldtog teen haar van die hospitaal se personeel en dokters ontketen.
Laevelder het in Maart berig oor die stryd wat Elsie du Plessis voer sedert sy ’n beweerde mislukte operasie by Rob Ferreira ondergaan het. In stede daarvan dat die mastektomie (wat in die Kaap plaasgevind het) se sny net geheel het, het die beweerde nalatige behandeling by Rob veroorsaak dat dit oopgebars en ’n erg septiese wond gevorm het.
Hoewel die hospitaal bevind het dat die kankergewas weer ontwikkel het, het hulle lank gesloer voordat sy behoorlike behandeling daarvoor ontvang het.
Sy moes later vir noodkanker- en -wondbehandeling na die Steve Biko Hospitaal in Pretoria oorgeplaas word in ’n poging om die wond en die kanker onder beheer te kry.
Du Plessis het destyds ’n klag by die kantoor van die gesondheidsombudsman (KGO) teen die hospitaal en die Mpumalanga se departement van gesondheid aanhangig gemaak.
Nadat sy daar ontslaan is, moes sy verlede week weer Rob Ferreira besoek om ’n skandering van haar bors te laat doen.
Tot haar skok het ’n dokter, wie se naam aan Laevelder bekend is, egter geweier om haar te behandel.
“Hy het aan my gesê hy sal my eers behandel nadat ek die klag wat ek by die KGO ingedien het, met Fridah Nyathi, die hospitaal se bestuurshoof, bespreek het.
“Indien sy dan instem, sal die dokters my kan behandel,” het ’n gefrustreerde Du Plessis die week gesê.
Die bron van die hospitaal se skynbaar ongevraagde aggressie en openlike diskriminasie teen Du Plessis is die onlangse bevinding wat deur die KGO uitgereik is.
In dié verslag word Rob Ferreira en die departement van gesondheid uitgewys as ’n sondebok omdat verskeie reëls en voorgeskrewe regulasies nie nagevolg is nie.
Dar is onder meer bevind dat:
• Rob Ferreira Du Plessis nie behandel het op ’n wyse wat normaalweg van toepassing is vir die erns van haar mediese kondisie nie
• Daar onnodig gesloer is om te opereer om onder meer ’n dreineringstelsel aan haar regterbors aan te bring
• Daar gesloer is om tydig deur middel van ’n biopsie weefselmonsters van haar bors vir ontleding te neem
• Dat daar gesloer is om haar vir radioterapie te stuur
• Die hospitaal nalatig was deur nie ’n radioterapiemasjien te koop sodat die onkologieafdeling behoorlike behandeling aan pasiënte kan gee nie
• Die hospitaal nie ’n behoorlike stelsel in plek het om wagtye vir behandeling te monitor nie. As gevolg hiervan moes Du Plessis onnodig lank wag vir dringende behandeling.
Die ombudsman het egter ook bevind dat die klagtes van Du Plessis dat studentedokters haar sonder toesig behandel het, ongegrond is, en dit van die hand gewys.
Na die jongste debakel by Rob Ferreira, het Du Plessis Dinsdag weer by Steve Biko gaan aanklop.
“Die dokters was van mening dat radiasie nie effektief gaan wees vir my kankerbehandeling nie, en ek gaan nou chemobehandeling kry.
“Ek word middel Oktober opgeneem vir my eerste sessie. Dit is egter net as palliatiewe sorg, omdat daar ongelukkig nie meer enige genesing vir my is nie. Dis nou maar wat dit is.” Vrae wat aan Dumisani Malamule, woordvoerder vir die gesondheidsdepartement, gestuur is oor die verdoemende KGO-verslag en moontlike dissiplinêre stappe teen personeel wat betrokke was, is nie beantwoord nie.