Kulturele reuse bring trane en blydskap na Innibos
WITRIVIER - Koos Kombuis en Andries Bezuidenhout het op 5 Oktober gesorg vir ’n betowerende vaarwel aan Innibos se In jou huis-musiekteaterkonsertreeks.
Die konsert is oudergewoonte regstreeks op Radio Laeveld uitgesaai en het gesorg vir trane én blydskap onder die klein gehoor wat by Bosch Ceramic Art Studios buite Witrivier bymekaargekom het.
Kombuis het nog altyd ’n sagte plekkie vir Mpumalanga. “Ná die heel eerste keer wat ek by die Nelspruit Lughawe geland het, het ek ’n herhalende droom oor die stad begin kry. Hulle hou al vir baie, baie jare aan en is altyd gelukkige drome. Dis rêrig lekker om terug te wees,” het hy gesê.
Innibos het keramiekmeesters Hanlie en Anton Bosch gevra om die konsert aan te bied, en hulle het op hul beurt die Witrivier DBV genomineer as begunstigde van die fondse wat die aand ingevorder is. Die DBV se voorsitter, Estelle de Villiers, sê: “Ons voel regtig geëerd om deel van hierdie ongelooflike aand te wees en om ’n hupstoot vir ons bedrywighede te kry.”
Beide folk-rock-kunstenaars het liedjies van hulle onderskeie nuwe albums vir die eerste keer gespeel.
Tussen die liedjies deur het Kombuis ook oor sy kreatiewe proses gesels. “Idees kom op die mees onmoontlike tye na my toe. Dan moet ek alles los en begin skryf, maak nie saak waar ek is of waarmee ek besig is nie. My skryfproses was nog altyd baie spontaan.
“Ek het die meeste van my jonger jare in kroeë en klubs gespeel, maar daai dae is nou verby. Nou hou ek daarvan om op die platteland te speel; dis net soveel rustiger.”
Bezuidenhout is ’n lid van die rock-band Brixton Moord en die Roof Orkes, maar tree ook as ’n solokunstenaar op. Een van die liedjies wat hy van sy nuwe album, Dink aan planete, gespeel het, was “Na die geliefde land” - absoluut hartroerend.
Hy geniet die kreatiewe sinergie tussen sy lewe as visuele kunstenaar, digter, skrywer en musikant, waarin hy plaaslike geskiedenis en Suid-Afrikaanse landskappe saambring in tye van radikale omgewingsverval en heersende sosiale ongelykheid.
Sommige liedjies het die gevoel van vervreemding wat sommige burgers binne die Suid-Afrikaanse konteks ervaar, opgeroep.
Die konsert kan werklik as ’n magiese en geweldige sukses beskryf word.