Gedugte atleet mik vir wêreldspele
TS Galaxy winless after seven matches
Juané le Roux, ’n steratleet van Hoërskool Nelspruit, deesdae beter bekend as Lulu, is een stappie nader aan haar droom nadat sy onlangs vir die internasionale rolstoel- en geamputeerde sport se wêreldspele (die IWAS Wêreldspele) gekwalifiseer het.
Dié spele, ’n multisportkompetisie vir atlete met gestremdhede, vind vanaf 23 tot 29 November plaas. Juané, nog 15, is sonder ’n linkervoorarm en -hand gebore. Dit is haar eie normaal en sy staan vir geen uitdaging terug nie. Dít bewys sy keer op keer.
Dié para-atleet vir die klas F46-afdeling
(o. 17) is die huidige Suid-Afrikaanse rekordhouer in skyfwerp, spiesgooi en gewigstoot. Dit volg na haar skittervertoning by die jaarlikse nasionale atletiekbyeenkoms vir atlete met gestremdhede, wat vanaf
20 tot 22 Maart in die Germiston Stadion plaasgevind het.
Laevelders ken en bewonder Juané, reeds ’n gevestigde worpeatleet, al vir ’n geruime tyd. Sy en haar afrigter, DP Badenhorst, verstom toeskouers met die afstande wat sy gereeld behaal.
In Maart het sy egter die ganse atletiekwêreld verras deur in al die worpeitems (vir dogters 17) in die klas F46-afdeling nie net goud te verower nie, maar telkens ’n nuwe Suid-Afrikaanse rekord op te stel. In skyfwerp het sy ’n stap verder gegaan deur vir ’n blinknuwe Afrika-rekord te sorg.
Spiesgooi: 26,6 m (SA rekord was 11,8 m) Gewigstoot: 9,98 m (SA rekord was 6,78 m) Skyfwerp: 28,57 m (SA rekord was 15,53 m en die Afrika-rekord 21,35 m).
In September, met die oog om in aanmerking te kom vir die Suid-Afrikaanse sportvereniging vir liggaamlik gestremdes (SASAPD) se span, wat volgende jaar aan die wêreldkampioenskappe in Parys gaan deelneem, het sy aan ’n SASAPD-byeenkoms in Gauteng in die o. 20-afdeling deelgeneem. Drie SA rekords het in dieselfde items in die slag gebly.
Haar afstande was die volgende:
Gewigstoot (4 kg): 8,85 m (SA rekord:
6,65 m). Die kwalifiserende afstand vir die F46-klas is 7,5 m
Skyfwerp (1 kg): 32,98 m (SA rekord: 16,29 m) Spiesgooi (600 g): 25,17 m (SA rekord:
15,7 m). Die kwalifiserende afstand vir die F46-klas is 21 m.
Met haar oog nou op die IWAS Wêreldspele, is daar egter eers ’n struikelblok wat oorkom moet word. Omdat sy steeds onder 17 is, kwalifiseer sy nie vir die Suid-Afrikaanse Nasionale Atletiekkomitee se borgskappe nie.
Haar ouers, Henk en Elize, is tans besig om deur middel van liefdadigheidsprojekte geld in te samel. Dit blyk egter asof dit nie genoeg gaan wees om die R100 000 wat benodig word, in te samel nie.
“In November gaan dit haar eerste buitelandse byeenkoms wees. Ons weet dit gaan groot deure vir haar oopmaak,” het Elize gesê.
Vir navrae en skenkings, skakel Marlene Dry by 082 905 4091.