Dis die klein dinge in die lewe wat vir Innibos en TRAC geld
MBOMBELA - Laevelders is gelukkige mense wat klaarblyklik die kosbare, klein oomblikke geniet én graag op ’n selfoonkamera vaslê.
Dít is dubbel en dwars bewys deur die meer as 250 inskrywings wat tydens die afgelope Innibos TRACselfoonfotokompetisie ontvang is.
Die wenners is verlede week tydens ’n geselligheid by SterKinekor in i’langa Mall aangewys.
Die tema van die Innibos TRACselfoonfotokompetisie was “Dit maak my gelukkig” en die publiek is uitgenooi om hulle selfoonfoto’s wat hierdie tema uitbeeld, in te stuur.
Dit het kopkrap gekos om die 40 finaliste uit die talle inskrywings met uiteenlopende temas aan te wys. Hierdie foto’s is gedruk en was deel van ’n uitstalling wat van 1 tot 6 November by i’langa Mall gehou is.
Tydens die prysuitdeling het Sandra Jacobs, Innibos se mediaen bemarkingsbestuurder, in haar toespraak verwys na die klein dingetjies in die lewe wat ’n mens gelukkig maak, en dat sulke oomblikke met die druk van ’n knoppie vasgevang word.
Die eerste prys van
R10 000 en ’n Samsung A53 van Vodacom i’langa Mall ter waarde van R8 500, is aan Andile Nkambule toegeken vir ’n foto waarin hy toon hoeveel genot ’n roomys hom verskaf. “Die pad na ’n man se hart loop mos deur sy maag,” was sy opmerking toe hy sy prys ontvang het.
Die tweede prys is aan Nicola Mason toegeken vir haar besonderse foto van blomme.
Vodacom het ’n spesiale foto uit die finaliste gekies wat hulle tema, “Further Together”, uitbeeld en het Evarné Potgieter se foto waar haar twee kinders ’n dubbelreënboog bewonder, met nog ’n Samsung A53 beloon. Hierdie foto het ook met die derde prys weggestap.
Henri Gouws, die bemarkingsbestuurder van i’langa Mall, sê die foto’s is ’n bewys dat dit die daaglikse klein dingetjies is wat ’n mens gelukkig maak en met dankbaarheid vul.