Stories Innibos vanjaar vir hoërskoolleerders
Ayesha Ebrahim en haar ouma, Aggie Zulu, by Lowveld High.
MBOMBELA - In 2014 het Innibos met die ondersteuning van die Hiemstra
Trust en die Departement van Kultuur,
Sport en Ontspanning ’n besondere Stories Innibos gepubliseer waarin verhale van laerskoolleerders opgeneem is. Vanjaar het Innibos weer so gemaak, maar hierdie keer was dit hoërskoolleerders wie se kortverhale opgeneem en gepubliseer is. Dit is ’n projek deur tieners, vir tieners.
Vanjaar is dit deur die Hiemstra Trust, die Stigting vir Bemagtiging deur Afrikaans en Innibos befonds.
Innibos is ’n kunstefees wat hom ten doel stel om die kunste op alle vlakke te bevorder. ’n Deel hiervan is om in ons plaaslike gemeenskappe ’n bewustheid en liefde vir die kunste te kweek. Die geskrewe woord en die kreatiewe uitbeelding van hierdie verhale vorm ’n belangrike deel hiervan. Die aanmoediging van lees onder die jeug sluit hierby aan.
Tien hoërskole in die omgewing het aan hierdie projek deelgeneem: Hoërskool Bergvlam, Valencia Combined, Hoërskool Nelspruit, Hoërskool Barberton, Hoërskool Rob Ferreira, Curro Nelspruit, Komatipoort Akademie, Curro Meridian en Hoërskool Lydenburg. Leerders vanaf gr. 10 tot 12 het deelgeneem.
Skole het hul beste verhale gekies en aan die Innibos-keurpaneel voorgelê, wat die beste verhaal uit elke skool gekies het.
Die volgende leerders was die wenners van die onderskeie skole en het elk prysgeld van R2 000 ontvang: Nokubonga Phakathi (Hoërskool Barberton), Megan van
Rooyen (Hoërskool Bergvlam), Gabrielle Underwood (Curro Nelspruit), Ezraite
Jamile (Curro Meridian Karino), SJ Botha (Komatipoort Akademie), Ayesha Ebrahim (Lowveld High), Abigajil Wilson (Hoërskool Lydenburg), Naomi Rousseau (Hoërskool Nelspruit), Amy van Deventer (Hoërskool Rob Ferreira) en Delight Endurance Mkabela (Valencia Combined).
Die leerders se wenverhale is in Afrikaans, siSwati en Engels vertaal en saam in ’n bundel gepubliseer. Hierdie is ’n uitstekende manier vir die jeug om mekaar se kultuur en taal beter te leer verstaan. Die verhale is in boek- sowel as e-boekformaat gepubliseer. Elke skool het ook ’n aantal van hierdie boeke ontvang wat hulle in die klas vir leeswerk kan gebruik.
“Hierdie is ’n pragtige boek met ’n verskeidenheid uiteenlopende verhale. Innibos is baie trots op die eindproduk,” sê Philna Scholtz, wat die projek bestuur het.