Oudpolisiebeampte van werker se moord aangekla
EMGWENYA - ’n Voormalige polisieman sit agter tralies in die dorp se polisiekantoor nadat hy na bewering ’n plaaswerker doodgeskiet het.
Die 42-jarige Hendrik Johannes ‘Heini’ Visagie, wat die afgelope paar jaar as bestuurder op die plaas Skoonspruit naby die dorp werk, het glo op Saterdag 20 April na ’n gekuier saam met een van sy plaaswerkers, Woest Michael Nkosi, ’n bok op die plaas geskiet.
Volgens ’n voorvalverslag wat deur sers. Mandla Nxumalo, die polisiewoordvoerder op die dorp, saamgestel is, het die twee die karkas agterop Visagie se werksbakkie gelaai en die vleis aan die familie van die 32-jarige Nkosi, wat daar naby in ’n stat woon, verkoop.
Hulle het die karkas glo vir R500 verkwansel.
Hulle het na bewering drank gekoop en is toe met die Komatimynpad terug na die plaas toe.
Nkosi is nooit weer lewend gesien nie.
Volgens die polisie het Nkosi se familie na hom begin soek, maar kon geen spoor van hom kry nie.
Twee dae later het sy ma, Martha Duduzile Sithole, hom by die polisie op die dorp as vermis aangemeld.
’n Grootskaalse soektog is op
Skoonspruit van stapel gestuur, maar sonder sukses.
Op 25 April het Visagie glo die polisie gekontak en homself aan hulle oorhandig. Hy het glo ook ’n bekentenis voor ’n senior offisier afgelê en Nkosi se lyk gaan uitwys waar dit in digte bosse versteek was.
Hy het ook twee jaggewere, ’n 303 en ’n .22 met ’n knaldemper, gaan uitwys waar hy dit glo tussen rotse gaan versteek het.
Die staat gaan probeer bewys dat Visagie en Nkosi op die nag van 20 April om die een of ander rede in ’n konflik betrokke was, waarna Nkosi by sy huis op die plaas doodgeskiet is. Visagie, die pa van drie minderjarige kinders, is daarna glo na sy eie huis toe.
Die polisie ondersoek ook bewerings dat Visagie op 21 April terug na Nkosi se woonplek is waar hy glo die lyk agterop sy bakkie gelaai het en dit in die bosse gaan versteek het.
Hy het Maandag vlugtig in die hof op klagtes van moord en regsverydeling verskyn.
Nxumalo sê Visagie se saak is tot 8 Mei vir verdere ondersoek en ’n aansoek van die verdagte vir regshulp uitgestel.