Johnny Reynders se dood laat ’n groot leemte op museumdorpie
PELGRIMSRUS - Die dood van die legendariese storieverteller, kenner van die Laeveld en kroegbaas van die dorp, Johnny Reynders, laat ’n groot leemte in sy gemeenskap.
Vir jare bekend as die nieamptelike burgemeester van dié kleurvolle museumdorpie, het hy hom deurlopend > Foto: Verskaf vir die goed van die dorpie en sy sakegemeenskap bemoei.
Reynders, ’n landmeter van beroep, het in die Laeveld beland met die bou van die nuwe toeristepad vanaf Graskop na die besienswaardighede van die Oostelike platorand, hier in die vroeë jare 70. Met die voltooiing van die projek het hy in die Laeveld agtergebly en hom vir jare op ’n paar dorpe in die omgewing in die slaghuisbedryf bevind.
Hy het net mooi 30 jaar gelede die gewilde The Vine-restaurant en -kroeg op Pelgrimsrus geopen. Dis ook hier waar sy 80ste verjaardag vroeër vanjaar gevier is.
The Vine het gou die hartjie van Pelgrimsrus geword, waar besoekers van elders en uit die buiteland met die mense uit die omgewing kon skouers skuur en tuis voel.
Hulde uit talle oorde stroom al sedert die naweek in toe Reynders binne ’n maand nadat ’n aggressiewe longkanker by hom gediagnoseer is, dood is. Sy vrou, René, ’n museum- en geskiedkundige wat hy op Pelgrimsrus ontmoet het, was die laaste dae langs sy bed toe hy Vrydag in die Nelspruit Mediclinic dood is. Hy en René het ’n seun, JT, wat voortaan sy pa se skoene sal volstaan.
Die familie sal binnekort ’n datum bekendmaak vir ’n viering van Johnny se lewe. Die familie uit die buiteland is nog op pad. Die geleentheid sal binne die volgende naweek of twee hier op sy geliefde Pelgrimsrus gehou word.