JOU SOSIALE vlinder
Een dag is jou kind nog pure baba en die volgende dag ontluik sy tot ’n selfstandige, eiewyse wesentjie wat presies weet wat sy wil hê.
Dit gebeur veral tussen vyf en ses jaar oud. Op daardie ouderdom ontwikkel kinders baie vinnig en dié jaar – gewoonlik die jaar wanneer hulle in graad R beland – is baie belangrik, sê kenners.
Hulle kan soms sukkel om by hierdie nuwe fase aan te pas, sê dr. Arina Lanser, ’n opvoedkundige sielkundige van Strubensvallei in Johannesburg. As gevolg daarvan kan hulle inkonsekwent en besluiteloos wees en selfs gedragsuiterstes toon. Dit maak hulle wisselvallige en onvoorspelbare speelmaats.
“Dis in dié tyd dat ’n groepsbewussyn ontwaak en wedywering op die voorgrond tree,” sê Arina. “Daar’s veral twee belangrike sielkundige veranderinge: Hulle begin hulle van hul ouers losmaak en begin die gevoel van aanvaarding deur hul portuurgroep ervaar.”
Graad R-kleuters se sosiale vaardighede het baie met hul maats te doen, maar hul verhouding met volwassenes verander ook, sê sy.
Verhouding met maats
● Op dié ouderdom kan jou kind al met maatjies praat oor dinge wat pla sonder om hulle seer te maak of te boelie. ● Sy verwar soms nog honger met hartseer en dit kan haar sosiale gedrag beïnvloed. ● Sy word mededeelsaam, behulpsaam
en bereid om haar beurt af te wag. ● Sy is gesteld op haar regte en erken ander se regte, en hou byvoorbeeld by die reëls van speletjies. ● Sy neem deel aan groepsaktiwiteite. ● Sy kan opregte vriendskappe smee. ● Sy kan “nee” sê, selfs vir haar beste of
enigste maats.