Oeps, het ek dit regtig gedoen?

“Heel in gedagte het ek ’n slag vir die sekuriteitswag by die werk ’n soen geblaas pleks daarvan om te waai soos ek altyd doen.” – Lauren Berrington, ma van Sophie

“Ek moes my motor by die paneelklopper gaan haal. Terwyl ek daar rondloop en my motor (wat op ’n hyser was) ondersoek, kon ek voel dat almal na my staar. Toe ek gaan sit om vir my kar te wag, besef ek eers dat ek neonblou pantoffels met plas-tiekhartjies dra.” – Cindy Gibson, ma van Chloe en swanger met baba nommer twee

“Met my eerste swangerskap het ek twee verskillende skoene werk toe aangetrek en dit nie eens agtergekom tot ’n vriendin dit uitgewys het nie. Met my tweede swangerskap het ek ongelukkig groot skade gehad toe ek agteruit in die lamppaal voor ons huis vasgery het!” – Liesel Schulze, ma van Ingrid en Gustav

“Ek het een dag ’n vergadering by ’n klein winkelsentrum bygewoon. Toe ek terugstap na my motor toe, wou die sleutel se afstandbeheerder nie die motor oopsluit nie. Ek druk en druk en niks gebeur nie. Nadat ek my man in ’n belangrike vergadering – en so ampertjies die AA ook – gebel het, besluit ek om maar vinnig ’n draaitjie te loop terwyl ek wag dat iemand my kom red. Op pad terug van die badkamer af na my kar toe besef ek toe dat ek die hele tyd besig was om aan die verkeerde motor te torring, een wat net soos myne lyk. Ek het nie eens besef dat ek by die verkeerde motor staan nie. Die mense wat daar naby in die koffiewinkel gesit het, het seker lekker vir my giggel!” – Jolindie Smith, ma van Michaela