Vir jou LEESVERSLAAFDE

Skelm rot

In Rower Rot steel die rakker van ’n rot almal se kos, tot ’n spierwit eend hom uitoorlê. Terwyl Rower Rot sy blink swaard uithaal om te veg oor melktert, vlug die eend met Rower Rot se perd. En raai wat doen Rower Rot deesdae? Hy is nie meer ’n rower nie … Protea, R110.

Pappa weet hoe!

Mario die mol is op soek na die beste manier om sy nuwe molkleintjies gelukkig te maak. Hy hou die ander diere op die plaas dop om te sien hoe hulle dit regkry: Hy sien hoe hasie hop, hoe ’n voël fladder en ’n eend rondplas. Hy kry egter niks onder die knie nie. Hoe gaan hy sy babatjies gelukkig maak? Protea, R100.

Luister nou mooi

Pensie spoeg vuur en ander draakstories en Lita in Towerland en ander towerponie-stories is fantastiese voorleesboeke. Elke boek bevat 12 opwindende verhale oor ’n wêreld vol avonture wat bevolk word deur drake, feë en kabouters. Human & Rousseau, R130 elk.

Speel & plak

Aspoestertjie Plakkerpret en Sneeuwitjie Plakkerpret sorg vir ure se vermaak. Elke boek bevat meer as 100 plakkers en uitdrukstukke. Die pragtige illustrasies, raaisels vol pret en klassieke stories van Aspoestertjie en Sneeuwitjie is elke kind se droom! Lapa-uitgewers, R39,95 elk.

In die bos

In Die Goorgomgaai draai die muis al die diere in die bos ’n rat voor die oë, oftewel so dink hy. Maar slim vang altyd sy baas, want hy loop hom kort voor lank vas in die honger Goorgomgaai. Hoe gaan die muis die Goorgomgaai oorreed om hom nie op roosterbrood te eet nie? Human & Rousseau, R125.