STEROÏEDINSPUITING VIR LONGE

Ek verwag my eerste kind. Daar is egter komplikasies en die ginekoloog het gepraat van ’n steroïed-inspuiting wat ek met die volgende ondersoek moet kry omdat dit lyk of ek vroeg gaan kraam. Wat is dit?

DR. JP DU BUISSON ANTWOORD:

Ek is jammer om te hoor van die komplikasies wat jy beleef. Die steroïed-inspuiting word gegee om te help sorg dat jou baba se longetjies vinniger volwasse raak. Dit kan tussen 24 en 35 weke toegedien word indien daar ’n vermoede is dat die baba weens komplikasies voortydig verlos sal moet word.

Dit bestaan gewoonlik uit twee inspuitings wat 24 uur uitmekaar binnespiers toegedien word. Die inspuiting se maksimum uitwerking vind plaas binne 48 uur ná die eerste inspuiting, maar dit begin reeds dadelik ’n verskil maak. Die voordeel vir die baba duur tot sewe dae ná die laaste inspuiting. Dit help nie net om die longetjies vroeg ryp te maak nie, maar ook om ’n breinbloeding te voorkom, asook ’n dermtoestand wat vroeggebore babas kan kry wat nekrotiserende enterokolitis genoem word. Nog ’n dosis kan toegedien word as daar meer as sewe dae ná die laaste inspuiting verloop het en dit duidelik is dat verlossing nou net om die draai lê. In hierdie omstandighede hou dit ’n voordeel in vir jou baba en geen nadeel vir jou nie. Sterkte met die pad vorentoe.