EEN SUSSIE EET TE VEEL, DIE ANDER TE MIN
My een dogtertjie is vier en die ander vyf. My jongste is effens oorgewig (darem nie te erg nie) en die ouer dogter kan weer gerus ’n paar ekstra kilo’s aansit. My oudste eet baie gesond en is lief vir vrugte; sy verkies dit bo enige ander peuselhappie. My jongste sal egter eerder ’n broodjie maak en is nie so lief vir vrugte nie. Ek bevind my in ’n moeilike situasie: Hoe moedig ek die een aan om te eet, terwyl ek juis nie wil hê die ander een moet meer eet nie?
ANEL KIRSTEN ANTWOORD:
As ouers sien dat hul kinders gewig aansit, raak hulle bekommerd dat ’n lewenslange stryd met gewig op hul kind wag. Ongelukkig voel kinders hierdie bekommernis aan en dink dan iets is met hulle verkeerd. Die hele gesin moet dus dieselfde gesondheidsbenadering volg.
Dit is beter om klem te lê op gesondheid pleks van gewig. Praat met jou kinders oor gesond eet eerder as oor dieet. Net langtermyn- gesonde eetgewoontes help mense om hul gewig in bedwang te hou.
Hier is ’n paar wenke: • Kies kos met ’n lae glisemiese indeks (GI) wat die bloedglukose en insulienvlak stabiel help hou en so ook eetlus beheer. Dit help ook met konsentrasie en die hele gesin vind baat daarby. Onthou, daar is ’n verband tussen ’n hoë insulienvlak en talle lewenstylsiektes. • Beperk suiker en ander verfynde kosse wat die insulienvlak verhoog en die eetlus kan aanwakker. • Maak seker jou kinders kry genoeg vesel in. Vesel hou ons langer versadig en help met die beheer van bloedglukose. Fokus veral op oplosbare vesel, want dit vorm ’n jel wat die vrystelling van glukose uit die voedsel in die bloedstroom vertraag. Voorbeelde is hawermout, appels, piesangs, lemoene, wortels, botterskorsie, ertjies en patat. Meng hawersemels in jogurt of strooi dit oor pap. Dit kan ook ’n bestanddeel wees in gladdejantjies, frikkadelle en bredies. Springmielies is ’n goeie peuselhappie omdat dit baie vesel bevat. • Gee met elke ete proteïenkos soos hoender, vis, vleis en eiers. As peuselhappies kan jy biltong, hoenderrepies en eiers aanbied. As ’n mens proteïen by maaltye voeg, word die kos stadig genoeg verteer om ’n uitwerking op die hele maaltyd se glukose-vrystelling te hê. Jou kind bly dus langer versadig. Gee ’n toebroodjie met eier of hoender pleks van konfyt of Marmite. • ’n Matige inname van gesonde vette soos avokado, neute, grondboontjiebotter (dié sonder bygevoegde suiker en gehidrogeneerde vet) het ook ’n versadigende uitwerking. Smeer avokado of grondboontjiebotter op ’n lae-GI-broodjie of gee ’n paar amandels saam met jogurt as peuselhappie. • Fokus op laekoolhidraat-peuselhappies soos biltong, natuurlike jogurt en vrugte, wat ook bloedglukose help beheer. • Eet as gesin saam. Dit maak maaltye ’n posi
tiewe gebeurtenis. • Maak oefening deel van die hele gesin se roetine en kry jou kinders betrokke by sport. Wees aktief saam met jou kind. • Stel ’n voorbeeld van goeie eetgewoontes. Kinders volg hul ouers se voorbeeld. As jy nie jou groente eet nie, gaan jou kinders nie hul groente eet nie. Moenie jou kinders selfbewus maak deur kommentaar oor hul gewig te lewer nie. Maak seker jou kinders weet jy is vir hulle lief oor wie hulle is en nie oor hoe hulle lyk nie.
As jy baie bekommerd is, kan jy ’n pediatriese dieetkundige raadpleeg om jou te help om jou kind se dieet aan te pas. Sy sal leiding kan gee oor porsiegroottes om toekomstige gewigsprobleme en meegaande komplikasies te voorkom.