BESTE vitamiene VIR KLEINGOED
Apteekrakke kreun van multivitamienen mineraalaanvullings – hoe kies jy die beste een vir jou kroos? Ons wys die toptien-aanvullings aan.
Tussen kieskeurige eters, kosallergieë en ’n bedrywige skedule deur voel baie mammas dat hul kleingoed ’n aanvulling nodig het. Vitamiene en minerale is belangrik vir kinders se algemene gesondheid, asook vir hul groei, ontwikkeling en optimale breinfunksie.
Mammas weet ook dat genoeg van die regte voedingstowwe sal voorkom dat die goggas wat by die kleuterskool rondloop die oorhand kry. Voldoende voeding help ook om chroniese siektes te voorkom.
Gesonde kos bly die beste manier om al die vitamiene en minerale in jou kind se lyfie te kry, ten spyte daarvan dat die kos van vandag dalk nie meer dieselfde gehalte as in ons oupas se tyd is nie. Aanvullings behoort nie gebruik te word om gesonde kos te vervang nie, maar eerder om aan te vul wat dalk kortkom. Dit beteken dus dat jou kind nie van Weense worsies en skyfies of witbrood en konfyt kan leef nie, selfs al koop jy die nommer
een-aanvulling. Multivitamien- en mineraalaanvullings is veiliger as enkelvitamienaanvullings omdat oormatige hoeveelhede maklik met laasgenoemde ingeneem kan word. Gebruik enkelvitamienaanvullings slegs op aanbeveling van jou dieetkundige of dokter. Kinders wat nie na wense groei nie, ’n swak eetlus het, gereeld siek is en kieskeurige eters is, kan baat vind by ’n goeie multivitamien.
As jou kind ’n kosallergie het, kan ’n aanvulling ook nodig wees, veral as sy vir meer as een kossoort allergies is. Kinders wat vegetaries of veganisties grootgemaak word, behoort ook daagliks ’n goeie aanvulling te gebruik.
Oorgewig kinders lyk op die oog af of hulle meer as genoeg voedingstowwe kry, maar baie van hulle het ’n tekort aan sekere mikrovoedingstowwe (vitamiene en minerale) en benodig ’n aanvulling. As jou kind in een van die groepe hierbo val, is die eerste stap om ’n dieetkundige te raadpleeg wat jou sal help om haar gesond te laat eet. ’n Mens kan ook ’n aanvulling gee net om seker te maak jou kind kry elke dag alles in wat sy nodig het. Kies jy die goedkoopste omdat dit jou sak pas, of die duurste omdat jy reken dat die prys op gehalte dui? Laat jy jou kind die een met die mooiste prentjie kies of gooi jy sommer die een in jou mandjie wat die mamma langs jou nou net gevat het?
Ons het die volgende in ag geneem met die keuse van die top-10 aanvullings vir babas en kinders (blaai om om dit te sien).
KRITIEKE MIKROVOEDINGSTOWWE VIR BABAS EN KINDERS
Die spesifieke vitamiene en minerale wat elke aanvulling bevat, is seker die belangrikste faktor wat in ag geneem moet word. ’n Mens kan egter nie net die aanvulling met die langste lys bestanddele kies nie. ’n Goeie aanvulling vir kinders bevat die voedingstowwe wat kinders nodig het en waarvan hulle meestal te min inkry.
Wêreldwye studies identifiseer vitamien A, jodium, yster en sink as vitamiene en minerale waaraan die meeste tekorte voorkom. Vitamien A, yster en sink is ook onder Suid-Afrikaanse kinders die algemeenste tekorte wat saam bydra tot ’n groter kans vir infeksie, swak groei en ontwikkeling, breinskade en swak verstandelike vermoë en werkverrigting.
REGULERING VAN AANVULLINGS
Die aanvullings op die winkelrakke is in die verlede nie deur enige organisasie of wet gereguleer nie. Die Medisynebeheerraad van Suid Afrika is in samewerking met die departement van gesondheid egter sedert 2013 in ’n proses om beter beheer oor aanvullings uit te oefen. ’n Voorlopige dokument is reeds in 2014 uitgereik en ons hoop dat ’n finale dokument in die nabye toekoms gewettig sal word. Hierdie dokument beskryf minimum en maksimum hoeveelhede wat in aanvullings mag voorkom en gee ook duidelike riglyne oor watter gesondheidsbewerings op produkte mag verskyn. Volgens die voorlopig voorgestelde regulasies word geen kunsmatige versoeters in aanvullings toegelaat nie. Sekere woorde soos en
word ook nie op etikette of in advertensies toegelaat nie.