Wonderweke: Nou kan jy jou baba verstaan!
Die een dag is jou baba rustig, stroopsoet en doodtevrede. Die volgende dag huil sy oor alles, wil nie slaap nie en wil sy heeldag in jou arms wees. Klink dit bekend? Jou baba beleef waarskynlik ’n wonderweek.
ALLE ouers weet dat babas soms lieftallig en soms veeleisend en klaerig is. Maar het jy geweet dit het met spesifieke ontwikkelingsfases te doen? Frans Plooij en Hetty van de Rijt, ’n Nederlandse egpaar wat albei dokters is, het oor ’n tydperk van 35 jaar breedvoerige navorsing oor babaontwikkeling gedoen. Hulle het die wêreld van ouerskap op sy kop gekeer met hul boek TheWonderWeeks (of Oei,ikgroei! in Nederlands) en miljoene ouers wêreldwyd volg hul raad. Daar ook ’n toep met dieselfde naam. Volgens die navorsing is daar 10 voorspelbare tye in jou baba se eerste twee jaar wanneer sy meer knieserig gaan wees. Hierdie “moeiliker tye” word wonderweke genoem waarin babas groot fisieke en sielkundige ontwikkelingsfases deurmaak en van hul wêreld probeer sin maak. Agt van die wonderweke vind in babas se eerste lewensjaar plaas. Ons bekyk dit hier.
VERANDERENDE SENSASIES (BEGIN TUSSEN VIER EN VYF WEKE)
In hierdie wonderweek dui alles daarop dat jou baba se metabolisme, organe en sintuie vinniger ontwikkel. Sy stel duidelik meer in die wêreld om haar belang en kan ook al ’n bietjie verder sien. Jy sal sien jou baba reageer dalk nou op jou nabyheid. Sy sal ook nou ware trane produseer wanneer sy huil.
Dinge wat jou baba moontlik kan baasraak ná hierdie wonderweek: • Sy kan nou langer en meer
gereeld na een voorwerp kyk. • Sy begin sosiaal glimlag. • Sy is nou ’n bietjie meer
wakker.
WONDERWEEK VAN PATRONE (TUSSEN SEWE EN NEGE WEKE)
Na afloop van dié wonderweek ervaar jou baba nie meer die wêreld as een onverdeelde voorwerp nie en begin verskillende patrone raaksien. Sy sien haar hande raak, kyk daarna en beweeg dit gereeld. Baie van jou baba se aanvanklike refleksbewegings word nou meer bewustelik uitgevoer.
Dinge wat jou baba moontlik kan baasraak ná hierdie wonderweek: • Sy kan haar kop nou baie
langer regop hou. • Sy draai haar kop in die
rigting van geluide. • Sy beweeg haar lyf vorentoe
wanneer sy op jou skoot sit. • Sy sal na speelgoed begin gryp, al kan sy dit nog nie raakvat nie.
Ingrid Fourie (30) van Bloemfontein, ma van Karli (5 maande) sê sy volg die wonderweke getrou. Sy het die toep gekoop. “Dit bly vir my wonderlik om Karli se ontwikkeling ná elke fase te sien en help werklik om haar moeiliker dae te verduidelik. Ek speel ook graag die speletjies met haar wat hulle voorstel en kan sien hoe sy dit geniet omdat dit ouderdomstoepaslik is.”