HAASTIGE HOND VERBRAND SY MOND

Die versoeking om te vroeg met vaste kos te begin, is groot. Mammas is gretig om kleingoed op hul smaakavontuur te begelei en hoop die nagte is rustiger. Ongelukkig wys navorsing die teendeel: kleingoed wat voortydig vaste kos kry, slaap slegter.

NÓG 6 GOEIE REDES OM GEDULDIG TE WEES

1 Eksklusiewe borsvoeding bied optimale immuunbeskerming. Babas wat voor ses maande begin eet, kry meer asemhalings-en maaginfeksies. 2 In die eerste halfjaar vervaardig ’n baba se liggaam nog nie die ensieme om proteïen, vette of komplekse koolhidrate af te breek nie. Borsmelk verteer so moeiteloos omdat Moeder Natuur die nodige ensieme daarby gevoeg het. Enige ander kos gaan óf onveranderd in baba se doek beland, óf hom krampe, winde en hardlywigheid gee. 3 Pasgebore babas het gapings tussen die selle in hul dermkanaalvoering waardeur virusse, bakterieë en allergene die bloedstroom kan binnedring. Eksklusiewe borsvoeding is van kritieke belang tot op ses maande, wanneer die “lekplekke” sluit, want die immunoglobulien in borsmelk seël die gapings soos stopverf. 4 Vroeë eters is geneig om later oorgewig te wees. 5 Hoe langer eksklusiewe borsvoeding duur, hoe meer gewig verloor jy. Jy sal later begin menstrueer, wat jou kans op bloedarmoede verlaag. 6 Voortydige vastekosinname lei tot premature spening. Moedersmelk is die crème de la crème van babakosse; in die eerste jaar is enigiets anders ’n powere plaasvervanger. Babas neem nie meer kalorieë in sodra hulle vaste kos kry nie. Hoe meer hulle eet, hoe minder borsmelk drink hulle.