FISIOTERAPIE VIR SEER LONGETJIES
My ses maande oue baba het brongiolitis. Die pediater het ons na ’n longfisioterapeut verwys. Wat behels longfisioterapie?
ANRO-MARI COHEN ANTWOORD:
Brongiolitis is ’n algemene lugweginfeksie wat babas en jong kinders aantas. Die simptome is soortgelyk aan dié van ’n verkoue en sluit ’n loopneus en gehoes in. Brongiolitis word dikwels veroorsaak deur die respiratoriese sinsitiale virus (RSV). Dit veroorsaak ontsteking in die kleinste deeltjies van die longe. Die ontsteking verminder die hoeveelheid lug en suurstof wat die longe moet bereik sodat dit vir jou kind nog moeiliker word om asem te haal. Respiratoriese fisioterapie is ’n manier om jou kind te help om van ekstra slym in sy longe ontslae te raak. Dit is belangrik, want te veel slym verstop die lugweg. Fisioterapie keer dat ekstra slym in die longe opbou. So ’n sessie maak gebruik van swaartekrag en verskillende posisies en soorte vibrasie om die slym los te maak sodat jou kind dit kan uithoes. ’n Longfisio-sessie lyk so: • Die fisioterapeut sal jou kind eers ondersoek deur met ’n stetoskoop na sy longe te luister. • Dan plaas die fisioterapeut ’n klein masker oor jou kind se gesig met stoom wat ingeasem word. Dit word nebulisering genoem. Die stoom wat uitkom is gewone soutwaterdruppels, maar jy kan ook medisyne wat deur die dokter voorgeskryf word met die soutwater meng. Dit help om die lugweg oop en die slym los te kry. • Daarna word jou kind in verskillende posisies geplaas om so verskillende dele van die longe en ribbekas te beklop. Beklopping word gedoen deur ritmies met jou hande te klop. • As jou kind al groot genoeg is word hy aangemoedig om die slym uit te hoes. So nie, word ’n suigtoestel aan die einde van die sessie gebruik om die slym te verwyder. • Tussendeur word ook verskillende asemhalingsoefeninge gedoen. WAT JY NOG VAN RESPIRATORIESE FISIOTERAPIE MOET WEET • Wag minstens ’n uur ná voedings voor jou kind behandel word. • Longfisioterapie maak nie seer nie. • Daar moenie direk op die ribbekas geklop word nie; die ribbekas moet met ’n handdoek bedek word. • As jou kind hoes is dit ’n goeie teken – dit help om van die slym ontslae te raak.