DENKBEELDIGE maatjie

My vierjarige seuntjie het ’n denkbeeldige maatjie. Hy het ’n baie kort humeur en huil as hy nie sy sin kry nie. Hy praat en antwoord die maatjie. Wat my ook bekommerd maak is dat hy lelike taal gebruik, soos “ek haat jou”, of dat hy mense gaan doodmaak. Wat moet ek doen?

LENMARIE STANTON ANTWOORD:

Die meeste jong kinders speel verbeeldingspeletjies met hul speelgoed asof die speelgoed lewendig is. Sowat 37 persent van kinders voer hierdie speletjies ’n treetjie verder en het ’n verbeeldingsmaatjie.

Nes regte maatjies gee verbeeldingsmaatjies ook nie altyd hul samewerking nie. Baie kleingoed kla dat hul verbeeldingsmaatjie nie altyd gehoorsaam is en nie kom as hulle geroep word nie, te hard praat, nie deel nie en selfs irriterende dinge doen, soos om jogurt in hul hare te smeer.

Hoewel kinders duidelike interaksie met hulle verbeeldingsmaats kan hê, weet hulle dikwels hulle is nie werklik nie en sal hulle spontaan sê: “Ek het hom net in my kop opgemaak.”

Aan die ander kant kan kinders ontsteld raak as hul verbeeldingsmaatjie byvoorbeeld wegraak of deur ’n kar raakgery word.

Wees gerus, jou kleuter sal nie in ’n eensame introvert sonder maatjies veran- der as hy ’n verbeeldingsmaatjie het nie. In navorsing is bevind dat kinders met verbeeldingsmaats dikwels meer spontaan is.

Jy wonder seker of jou seuntjie sukkel met onderliggende aggressie as sy verbeeldingsmaatjie sulke aggressiewe dinge sê? Onthou, verbeeldingsmaatjies kan ’n voordeel vir kind sowel as ouer inhou en kan jou insig gee in die dinge waaraan jou kind dink en wat hy verwerk.

Dit kan jou baie leer van jou seuntjie se sielkundige ontwikkeling en sosiale lewe. As jou seuntjie vir jou vertel dat sy maatjie baie kwaad is en iemand wil seermaak, gee hy vir jou die ideale geleentheid om oor iets te praat wat hom dalk pla. Soms is dit vir kinders makliker om hul emosies met die hulp van ’n derde party soos ’n verbeeldingsmaatjie bekend te maak.

Jy hoef nie van hulle te verwag om net soos hul verbeeldingsmaat te voel nie. Pleks daarvan kan jy eerder oop vrae vra soos: “Hoekom dink jy voel jou maatjie so kwaad?”

Kleuters voel dikwels onder druk weens reëls en skep alter ego’s wat die skuld vir hul verkeerde gedrag kan aanvaar. As jou seuntjie se verbeeldingsmaat egter vir iets soos die muurkuns verantwoordelik gehou word, is dit tyd om tussenbeide te tree.

Dit is nie noodsaaklik (of nuttig) om uit te wys wat julle albei reeds weet nie, naamlik dat Kwaai Karel dit nie kon gedoen het nie omdat hy nie bestaan nie. Speel liewer saam en dwing gevolge af: “Al het Kwaai Karel al die speelgoed uitgegooi en in die speelkamer gelos, sal jy hom moet help opruim.”

Herinner jou seuntjie daaraan dat reëls steeds reëls bly en dat alle maatjies – verbeeldingsvriende of regtes – dit moet gehoorsaam.