BEHANDELING
Dit is altyd wys om jou dokter van jou baba se afgeplatte koppie te vertel sodat toestande soos kraniostenose en tortikollis uitgeskakel kan word.
Kraniostenose is ’n geboorte-afwyking wat veroorsaak dat die nate van die skedel te vroeg sluit sodat die skedel klein is en breingroei beperk word. Dit word met chirurgie reggestel.
Tortikollis ontstaan weer wanneer jou baba se nekspiere styf is sodat die nekkie skeef staan en die koppie afgeplat word op die kant waar baba aanhoudend lê.
Gewoonlik is plathofiesindroom ’n minder ernstige, kosmetiese kwessie wat nie jou kleinding se ontwikkeling belemmer nie. As jou baba jonger as drie maande oud is, sal jou dokter moontlik posisionele terapie voorstel, terwyl sommige dokters sal voorstel dat ’n baba ouer as vyf maande eerder helmterapie ondergaan.
POSISIONELE TERAPIE Dit behels dat jy jou baba daarvan weerhou om op die plat deel van sy kop te slaap, of minstens die hoeveelheid tyd wat hy daarop deurbring, verminder.
Hou in gedagte dat dit tussen twee en drie maande sal duur voor jy ’n verbetering sien.
Magietyd is een van die noodsaaklike posisies in hierdie terapie. Magietyd versterk die spiertjies in jou baba se nek, skouers en arms, en help ook om jou baba se maagspiere sterk te maak.
Hierdie terapie sluit ook in dat jou baba se kot omgedraai word, of dat jy jou baba aan die voetenent laat slaap, sodat jou baba gedwing word om na die ander kant te kyk en drukking nie op die afgeplatte deel is nie.
’n Goeie idee is om ’n bewertjie of speelding te hang aan die kant waarna jy wil hê jou baba moet kyk.
HELMTERAPIE Dié behandeling word aanbeveel vir babas tussen drie en ses maande oud omdat die belangrikste kopgroei en -ontwikkeling in jou baba se eerste jaar plaasvind. Helmterapie maak juis van hierdie groei gebruik om die misvorming reg te stel.
Die terapie werk as volg: Die helm rus sagkens op die beendere wat uitbult en is hol by die afgeplatte dele van jou baba se kop. So laat dit die plat dele toe om in te haal. Die presiese behandeling hang af van jou baba se ouderdom.
Die Paarlse pediater dr. H.P. van der Merwe sê helmterapie word egter net vir kwaai misvormdheid voorgeskryf en beslis nie vir babas jonger as drie maande nie.
“Navorsing wys dat die konserwatiewe posisioneringsterapie, wat in erger gevalle met fisioterapie aangevul word, in sowat 80 persent van gevalle suksesvol is.”
As daar tussen vier en ses maande later nie ’n verbetering is in die ernstiger gevalle nie, kan helmterapie van waarde wees, sê H.P.
“Helmterapie werk op sy beste as ’n baba dit 23 uur van die dag dra. Dis ook duur, nie geredelik in Suid-Afrika beskikbaar nie en die helm moet gereeld verstel word.”
Newe-effekte van helmterapie sluit in velirritasie, oormatige sweet en ’n onaangename reuk. Ouers voel soms dat hulle nie hul baba fisiek kan koester nie en party ouers vrees dat hul baba ongemaklik voel.
Helmterapie is dus nie die oplossing vir elke asimmetriese koppie nie, waarsku H.P.
Voor 1995 het sowat 1 uit 3 000 babas plathofiesindroom opgedoen. Die nuutste navorsing wys dat die syfer in Amerika nou een uit 80 is en in Europa een uit 60. Dit verteenwoordig ’n styging van 500 persent.