DIE ROL VAN VASTE KOS

Rondom ses maande begin die ystervoorraad waarmee ’n baba gebore word, uitgeput raak. Jou baba se groeiende lyfie het ook nou ekstra sink nodig. Uit ’n ontwikkelingsoogpunt is die meeste kinders tussen ses en agt maande gereed om te eet, dus is dit die ideale tyd om borsmelk met vaste kos aan te vul.

Het jou baba voor ses maande ekstra yster nodig?

Dis onwaarskynlik. Hoewel borsmelk betreklik min yster bevat, is dit so opneembaar dat baba byna alles kan benut. Borsbabas ontwikkel selde ’n ystergebrek, tensy hulle vroeggebore is of aan ’n chroniese toestand ly. Onnodige ysteraanvullings skep dikwels die einste probleme wat dit kwansuis moes oplos. Dit kan hardlywigheid of diarree veroorsaak, asook mikroskopiese bloedings in die dermkanaal wat tot bloedarmoede kan lei. Daarbenewens verlaag dit immuniteit omdat dit met die werking van laktoferrien inmeng. Laasgenoemde is ’n borsmelkproteïen wat skadelike dermkanaalbakterieë kniehalter deur met oortollige ystermolekules te bind. Sulke bakterieë gedy op yster en vermenigvuldig sodra daar oorskiet is. Aanvullings skep ’n oormag ystermolekules wat die beskikbare laktoferrien oorweldig. Vra jou baba se dokter om sy ystervlak te toets voor hy of sy ’n stropie voorskryf.

Wanneer is jou pienkvoet gereed vir vaste kos? Kinders is individue en ontwikkel teen hul eie pas. Sommiges wil voor ses maande al ma of pa se kos gaps, terwyl ander hul mond lank daarna bly toeknyp. Die goue reël? Hou baba eerder as die kalender dop.

Hy is waarskynlik reg om te begin eet indien hy… • Goeie nekbeheer het en sonder onder

steuning kan sit, • Ander se kos van hul borde af kyk –

of vat, • Sy mond oopmaak wanneer jy vir hom kos aanbied en dit nie refleksief met sy tong uitstoot nie, en • Nog honger optree ná voedings.

Onthou: As hy jonger as ses maande is, gaan hy waarskynlik bloot deur ’n groeiversnelling. Voed hom eers vir twee of drie dae meer gereeld om dié moontlikheid uit te skakel.