Leeshoekie
Nuut op die rak al die boekwurms in die huis.
LAF, LAF, LAF
Tjiff en Tjaff se liedjieboek en oudio-CD bevat die bekende KykNet-karakters se gewildste liedjies. Die woorde van die 20 saamsing-liedjies verskyn in die boek en word prettig met tekeninge en foto’s geïllustreer. Jou kleuter kan saam met treffers soos “Verrassing”, “Die opruim-liedjie”, “Die hande-liedjie” en “Skoenlapper” sing – alles bekende liedjies uit die TV-reeks en teateroptredes. Human & Rousseau, R200.
VRIENDSKAP
Bytjie en Beer is ’n pragtige boek met helder illustrasies wat jou kleutertjie baie sal geniet! Die jong dierkaraktertjies, Bytjie en Beer, is te oulik en leer jou kind ’n belangrike lewensles oor ware vriendskap. Die boek is ideaal vir voorlees en nuwe lesertjies sal ook daarby aanklank vind. Penguin Random House, R80.
DIE GUNSTELINGKAT
Mollie die moedige kat sluit ses van die gewildste Mollie-stories deur Judith Kerr in: “Mollie se medalje”, “Mollie en Hasie”, “Mollie se bollie”, “Mollie en die baba”, “Mollie en die jakkalse” en “Mollie se Kersfees”. Die prettige, helder illustrasies help jou kleuter om presies te verstaan wat Mollie alles aanvang. Protea Boekhuis, R265.
EEN, TWEE, DRIE
Ek kan tel: Plaas en Ek kan tel: Dieretuin is twee kartonboeke wat ideaal is vir jou nuuskierige baba. Hierdie prettige boeke maak dit maklik om tot 10 te leer tel en leer jou kind meer van ’n dieretuin of die plaas. Selfs beginnerlesertjies sal die boek geniet en maklik lees aan die groot teks. Die illustrasies is helder en propvol kleur. Lapa Uitgewers, R100 elk.
OP DIE MAAN
Die Dingesfabriek: Jannus en Kriek en die
tydmasjien is ’n snaakse boekie wat geskik is vir beginnerlesers. Die teks word in die boek afgewissel met illustrasies waarvan jou kind baie sal hou. Hierdie boek het vele interessante karakters, soos die tweeling Jannus en Kriek, maar die gunstelingkarakter is sekerlik hul oupa.
Hy woon onder Huis Deurmekruis, Jannus en Kriek se huis, in ’n kelderverdieping. Oupa doen allerhande interessante dinge daar in sy laboratorium. Tafelberg, R135.