EKSTRA oemf VIR JOU BABA
10 maniere waarop jy in jou swangerskap kan sorg dat jou baba sy lewe op die beste manier moontlik afskop.
WENK 1 BEGIN ’N DAGBOEK
Neem foto’s, skryf briewe vir jou ongebore baba of skep vir baba ’n storie oor hoe julle op sy koms wag. Daar is vir ’n kind niks lekkerder as om te hoor hoe hy van ’n vonkel in jou oog tot ’n klein mensie gegroei het nie – neem dus foto’s van jou swellende boepie en hou al sy sonarfoto’s, asook foto’s van jou ooievaarsparty.
Skryf neer hoe jy gevoel het toe jy uitgevind het jy is swanger, hoe ander mense op die nuus gereageer het, hoe julle op ’n naam besluit het, wanneer julle die geslag vasgestel het, en enige snaakse stories oor jou swangerskap, soos jou lus vir vreemde kosse, of wat ’n vreemdeling in die winkel oor jou boepie kwytgeraak het.
WENK 2 GESONDE LEEFSTYL
Een van die grootste geskenke wat jy jou ongebore baba kan gee, is om gesond te leef. Op hierdie manier help jy verseker dat hy as ’n fris en gesonde baba die wêreld betree.
Eerstens is ’n gebalanseerde dieet met kos uit al die voedselgroepe belangrik. Dis beslis nie nou die tyd om daardie ekstra paar kilo’s te probeer afskud nie! Kenners sê jou dieet moet genoeg proteïene en energie bevat dat jou baba genoeg gewig kan aansit, aangesien babas met ’n lae geboortegewig later meer geneig is tot hartsiektes, hoë bloeddruk en diabetes.
Drink daarby ’n vitamienaanvulling sodat jy seker is jy kry genoeg noodsaaklike voedingstowwe in soos foliensuur, wat ’n rol speel in die voorkoming van spina bifida. Gereelde dokterbesoeke sal verseker dat probleme so gou moontlik opgespoor en behandel word.
WENK 3 VERBODE MIDDELS
Alkohol, dwelms en sigarette is drie groot moenies tydens swangerskap. Rook hou verskeie nadele vir jou baba in: Die nikotien laat jou are saamtrek sodat baba minder suurstof kry en koolstofmonoksied in sy lyf ophoop. Studies wys dit kan bydra tot ’n laer geboortegewig. Nog ’n studie het bevind rokende swanger vroue se kinders het dikwels kleiner breine, en hoe meer ’n swanger vrou rook, hoe groter is die gevaar dat haar kind gedragsprobleme sal hê.
Die grootste gevaar van alkoholmisbruik is fetale alkoholsindroom (FAS) en die gepaardgaande verstandelike gestremdheid. Net ’n enkele keer se oordadige drankmisbruik tydens swangerskap kan lei tot FAS. Onthou, jou baba drink as jy drink.
Dwelmmisbruik kan jou baba se organe beskadig en keer dat hy normaal groei en ontwikkel. Dit vergroot ook jou kans vir ’n miskraam.
WENK 4 BREINKOS VIR JOU SLIMKOP
Kenners verskil oor die waarde van voorgeboortelike stimulasie van die fetus se intelligensie. Terwyl sommige studies ’n band tussen fetale stimulasie en hoë intelligensie toon, is ander wetenskaplikes skepties. Almal is dit wel eens dat dit nie skade kan aanrig nie – speel dus gerus vanaf vyf maande vir jou baba musiek in die baarmoeder (net nie te hard nie). Dit bevorder blykbaar jou baba se vermoë om te leer. Of lees vir baba – dis glo goed vir taalontwikkeling.
Jy kan ook jou baba se brein ontwikkel deur breinkosse te eet, soos kosse wat omega 3-vetsure bevat. Dit sluit in donkerkleurige vis of visolie, kos wat yster bevat soos spinasie, boontjies en hoender (dis nodig om genoeg suurstof na baba se brein te stuur), en genoeg proteïene vir breinbou. Antioksidante soos tamaties kan weer baba se breinweefsel help beskerm.
WENK 5 BIND MET BABA
Moenie wag tot jou baba gebore is om ’n spesiale band met haar te ontwikkel nie – sodra jy die positiewe strepie op die toetsie sien, kan binding begin. Maak tyd elke dag om rustig te raak. Gesels met jou baba, vryf oor jou magie, geniet dit om haar te voel skop terwyl jy in die bad lê. As sy ná geboorte in jou oë kyk en jou stem hoor, sal julle soos ou bekendes voel.
WENK 6 KIES ’N PEDIATER
Jou baba se pediater is iemand saam met wie jy nog ’n lang pad gaan stap. Maak seker jy kan die pediater sonder huiwering vertrou met jou kosbare vraggie se gesondheid deur reeds tydens swangerskap te begin soek na iemand wat aan jou vereistes voldoen.
WENK 7 VOLG ’N NOODHULPKURSUS
Daar lê vir jou ’n hele leeftyd van pleisters opplak en seerplekke gesond soen voor – maar ook die gevaar van die soort seerkry waarvoor soene nie genoeg gaan wees nie. Hoe voorbereid is jy op die hantering van noodgevalle?
Noodhulp vir babas en volwassenes verskil. Jou swangerskap is die ideale tyd om jou toe te rus vir moontlike latere noodgevalle deur ’n noodhulpkursus vir babas te volg sodat jy kan weet wat om te doen. Dis ’n wenresep vir gemoedsrus en jou baba se veiligheid.
WENK 8 NEEM FOTO’S
Professionele foto’s van swanger magies word ál gewilder en dis ’n uitstekende verduideliking vir jou kind van daardie spesiale tyd toe hy binne-in jou gegroei het. Die beste tyd vir foto’s is gewoonlik tussen 32 en 37 weke van swangerskap omdat jy heel moontlik nog goed gaan voel en maklik sal kan beweeg. Laat maak ’n album of fotoboek met hierdie spesiale herinneringe.
WENK 9 WEES ONTSPANNE
Kwaai spanning en trauma terwyl jy swanger is, skei sekere hormone in jou lyf af wat jou baba kan beïnvloed. Studies het gewys die babas van gespanne ma’s is geneig om vroeër gebore te word en is dikwels ondergewig.
Wend ’n doelbewuste poging aan om stres in jou werkomgewing te verminder, en leer ontspanningstegnieke aan soos diep asemhaling. Soek hulp as jy regtig sukkel om te ontspan.
WENK 10 WEES GEORGANISEERD
Jou babatjie is heeltemal van jou en jou maat afhanklik. Niemand wil daaraan dink nie, maar sou albei van julle iets oorkom, is dit noodsaaklik dat julle van dag een van sy kosbare lewetjie af reeds ’n plan in plek het om te sorg dat daar genoeg voorsiening gemaak word vir sy versorging. Gaan spreek ’n finansiële raadgewer, vra raad oor lewensversekering en maak seker jul testament is in orde.
Dis nou ook ’n goeie tyd om te dink aan wie jul kleinding moet versorg as julle dit nie self kan doen nie. Dui dit so in jul testament aan.